नेपाली राष्ट्रिय क्रिकेट टिमका खेलाडी सन्दीप लामिछाने नयाँ विश्व रेकर्ड बनाएका छन् । एक दिवसीय क्रिकेट अन्तर्गत सबैभन्दा कम खेलमा १०० विकेट लिने खेलाडीको रुपमा उनले विश्व रेकर्ड बनाएका हुन् ।
आज प्रिमियर कप अन्तर्गत काठमाडौँको किर्तिपुर स्थित टियु क्रिकेट मैदानमा ओमान विरुद्द भएको खेलमा उनले विकेट लिएसँगै उनको १०० विकेट पुगेको हो । उनले खेलको १२.३ ओभरमा ओमानका आदील सिद्धिकीको विकेट लिएका हुन् । यो विकेट सँगै उनको ४२ खेलमा १०० विकेट पुरा भएको हो ।
यस अघि सबैभन्दा कम खेलमा १०० विकेट लिने खेलाडीको रेकर्ड अफगानिस्तानक राशिद खानको नाममा थियो । उनले ४४ खेलमा १०० विकेट लिएर किर्तिमान बनाएका थिए। सन्दीपले ४२ खेल मै १०० विकेट लिएर खानको नाममा रहेको सो रेकर्ड आफ्नो नाममा कायम गरेका हुन् ।
काठमाडौँमा जारी प्रिमियर कपको विजेताले एशिया कप खेल्न पाउने छ ।
