दूरसञ्चार सेवा प्रदायक एनसेल आजिएटाले नेपाल दूरसञ्चार प्राधिकरणलाई शेयर खरीद-बिक्रीसम्बन्धी दस्तावेजहरू पठाएको छ । कम्पनीले बुधबार प्राधिकरणलाई आफ्नो ८० प्रतिशत शेयर खरीद-बिक्रीसम्बन्धी दस्तावेजहरू पठाएको हो।
प्राधिकरणका प्रवक्त्ता सन्तोष पौडेलले एनसेलले पत्र पठाएको पुष्टि गरे ।
प्राधिकरणले मंसिर १४ मा खरिद–बिक्रीबारे वास्तविकता बुझ्न एनसेललाई पत्र पठाएको थियो । प्राधिकरणले मंसिर २५ मा एनसेललाई दोस्रो पत्र पठाई कागजपत्र माग गरेको थियो । एनसेल प्रकरणबारे अध्ययन गर्न बनेको उच्चस्तरीय छानबिन समितिसँगै संसदीय समितिहरूले पनि प्राधिकरणसँग काज्गत माग गरिरहेका थिए ।
सरकारले नै कम्पनीको शेयर खरिद बिक्री प्रक्रिया छानबिन गरिरहेको छ । सरकारले टङ्कमणि शर्मा दङ्गालको संयोजकत्वमा समिति गठन गरेको छ। सरकारले यही मङ्सिर २१ गते एनसेलको शेयर खरिदबिक्रीका सम्बन्धमा, प्रचलित कानुनको परिपालना, राजस्व र नेपालमा वैदेशिक लगानीमा पर्न सक्ने असरलगायत विषयको अध्ययन तथा छानबिन गरी ३० दिनभित्र प्रतिवेदन पेश गर्न शर्माको संयोजकत्वमा समिति गठन गरेको थियो ।