होटल संघ नेपाल (हान) अध्यक्ष विनायक शाहले मौद्रिक नीतिमार्फत पर्यटन क्षेत्र चलायमान हुने खालको प्रवन्ध हुनुपर्ने माग गरेका छन् । नेपाल व्यवस्थापन संघ (म्यान)ले आयोजना गरेको मौद्रिक नीति पूर्वको छलफलमा हानका अध्यक्ष शाहले पर्यटन व्यवसाय विस्तारै लयमा फर्किने क्रममा रहेको भएपनि अहिले नै फर्किनसकेकाले कर्जाको पुर्नसंरचना र पुर्नतालिकीकरणको व्यवस्थाका लागि माग गरे ।
त्यस्तै, विदेशी पर्यटक नेपाल आउँदा उसले साटेको नेपाली रुपैयाँमै भूक्तानी गर्न सक्ने व्यवस्था मिलाइदिन पनि उनले माग गरेका छन् ।
त्यस्तै, भारतीय पर्यटकहरु नेपाल आउँदा २५ हजार रुपैयाँ मात्रै बोकेर आउनुपर्ने बाध्यात्मक अवस्था रहेको भन्दै हानका अध्यक्ष शाहले यो क्यापलाई हटाएर कम्तीमा १ लाख पुर्याउन पनि माग गरेका छन् ।
‘भारतीय पर्यटकहरु बढ्दो क्रममा छन्, तर उनीहरु नेपाल आउँदा २५ हजार भन्दा बढी लिएर आउन पाउँदैनन्’ अध्यक्ष शाहले भने, ‘यो क्यापलाई कम्तीमा १ लाख बनाइनुपर्छ ।’
त्यस्तै, युरोपका देशबाट आउने पर्यटकले प्रतिदिन ३ सय डलरभन्दा बढी रकम साट्न नपाउने व्यवस्था पनि पर्यटन क्षेत्रमैत्री नरहेको भन्दै उनले यसलाई हटाएर जति पनि साट्न पाउने व्यवस्था हुनुपर्ने माग गरेका छन् ।