नेकपा माओवादी केन्द्रका उपाध्यक्ष कृष्णबहादुर महरा पक्राउ परेका छन् । महरालाई प्रहरीले कपिलवस्तुबाट पक्राउ गरेको हो ।
सुन तस्करी प्रकरणमा छानबिनको लागि प्रहरीले उनलाई पक्राउ गरेको हो । सुन तस्करी सम्बन्धी छानबिन गर्न गठित उच्चस्तरीय जाँचबुझ आयोगले महरालाई मुद्दा चलाउन सिफारिस गरेको थियो ।
उच्च अदालतका पूर्व न्यायाधीश डिल्लीराज आचार्य संयोजकत्वको आयोगले पूर्व सभामुख महरा दोषी रहेको ठहर गर्दै उनीमाथि मुद्दा चलाउन सिफारिस गरेको थियो । चैत १ गते बिहीबार आयोगले गृहमन्त्री रवि लामिछानेलाई प्रतिवेदन बुझाएको थियो । आइतबार मात्र गृहमन्त्री रवि लामिछानेले सुन तस्करी प्रकरणमा मुछिएका सबै जनामाथि अनुसन्धान प्रक्रिया अगाडि बढाउन प्रहरीलाई निर्देशन दिएका थिए ।
गृहमन्त्रीले सो प्रतिवेदन प्रधानमन्त्रीलाई बुझाएका थिए । मन्त्रिपरिषदको बैठकले नै प्रतिवेदन कार्यान्वयनमा लैजाने निर्णय गरेको थियो ।