परराष्ट्रमन्त्री प्रदीप ज्ञवालीले कालापानीबाट भारतीय सेना फिर्ता लैजान भारतलाई आग्रह गरेका छन् । भारतीय पत्रिका द हिन्दुसँगको अन्तर्वार्तामा परराष्ट्रमन्त्री ज्ञवालीले सुगौली सन्धिको भावना सम्मान गर्दै सेना फिर्ता लैजान भारतलाई आग्रह गरेका हुन् ।
‘कालापानीबाट सेना फिर्ता गरी सो भूभाग नेपाललाई फिर्ता गरेको अवस्थामा मात्र सुगौली सन्धिलाई सम्मान गरेको ठहर्छ’ परराष्ट्रमन्त्री ज्ञवालीले भनेका छन्, ‘भारतले नेपाली भूभागमा एकतर्फी रुपमा सडक बनाउनु हुँदैनथ्यो र वार्ताबाटै समस्या समाधान गर्नुपर्ने थियो भन्ने कुरामा पुनः जोड दिन चाहान्छौं ।’
मन्त्री ज्ञवालीले भारतले बिगतमा भएका सहमतिको ठाडो उल्लंघन गरेको बताएका छन् । मन्त्री ज्ञवालीले भनेका छन्, ‘भारतले एकतर्फी नक्सा सार्वजनिक गर्नु सन् १९९७ मा तत्कालीन प्रधानमन्त्री इन्दरकुमार गुजरालको काठमाडौं भ्रमणका बेला भएको सहमतिको ठाडो उल्लंघन हो ।’
