नेपाल बीमक संघले पुन: कृषि बीमालेख जारी गर्ने कार्य सुचारु गरेको छ । संघका महासचिव अशोक कुमार खड्काले २०८० साल अषाढ मसान्त सम्मको लागि आजैका मितिदेखि बीमालेख जारी गर्ने कार्य सुचारु गरिएको बताए।
सरकारले लामो समयदेखि बीमकहरुले अनुदान रकम नदिएको भन्दै संघले गत जेठ ७ गतेदेखि कृषि सम्बन्धी बीमालेख जारी गर्न बन्द गरेको थियो । यस विषयमा कृषि तथा पशुपन्छी विकास मन्त्री डा. बेदुराम भुसालको अध्यक्षतामा मन्त्रालयका दुवै सचिवहरुको संयुक्त सहभागीतामा बसेको बैठकले अनुदान रकम तत्काल उपलब्ध गराउने प्रतिवद्दता जनाएपछि कृषि बीमालेख जारी गर्ने कार्य सुचारु गरिएको संघका महासचिव खड्काले जानकरी दिए।
यदि असार मसान्तसम्म अनुदान रकम प्राप्त नभएमा पुनःबीमालेख बन्द गरिने संघले जनाएको छ। संघले नेपाल सरकार , कृषि तथा पशुपन्छी विकास मन्त्रालय अन्तर्गतका विभागहरु तथा नेपाल बीमा प्राधिकरणलाई कृषि बीमा वापतको अनुदान तत्काल उपलब्ध गराउन सहजता अपनाई पहल गरि दिन समेत अनुरोध गरेको छ।
