बैंकिङ्ग प्रणालीमा लगानी योग्य रकम अधिक भएपछि केन्द्रिय बैंकले बैंकिङ्ग प्रणालीबाट निक्षेपको रुपमा रकम संकलन गरेको छ ।
चालू आर्थिक वर्ष २०८०/८१ मा मंसिर ६ गते पहिलो पटक बैंकिङ्ग प्रणालीबाट रकम संकलन गर्न लागेको थियो । एक महिनाको अवधिका राष्ट्र बैंकले एक खर्ब ९७ अर्ब २५ करोड रुपैयाँ संकलन गरिसकेको छ । केन्द्रिय बैंकले १३ पटकमा उक्त रकम बजारबाट खिचेको हो ।
राष्ट्र बैंकले पुस लागेयता मात्रै चार पटकमा ७० अर्ब रकम खिचेको हो । केन्द्रिय बैंकले निक्षेपका लागि उक्त रकमको आव्हानमा बैंकहरुले एक खर्ब ४२ अर्ब ८० करोडको आवेदन परेको थियो ।
त्यसैगरी राष्ट्र बैंकले मंसिरमा ९ पटकमा एक खर्ब २७ अर्ब २५ करोड रुपैयाँ निक्षेप संकलन गरेको देखिन्छ । बैंकले सो अवधिमा एक खर्ब ४५ करोडको लागि आव्हान गरेकोमा बैंकहरुबाट ३ खर्ब ९ अर्ब ८० करोडको आवेदन परेको थियो ।
बैंकमा लगानी योग्य रकम थुप्रिएपछि बैंकहरु पनि अत्यन्त कम ब्याजदरमा राष्ट्र बैंकमा निक्षेपको रुपमा रकम राखेका हुन् । यसअवधिमा बैंकहरुले औसत ब्याजदर ०.७०४८ प्रतिशतदेखि २.९९५७ प्रतिशतसम्म निक्षेपमा राखेका हुन् ।
