.gif)
गत भदौ अन्तिमबाट आन्तरिक राजस्व विभागले करिब २ हजार फर्म तथा कम्पनीले राजस्व छली गरेको आशंकामा अनुसन्धान सुरु गर्यो । नक्कली बिल बिजक पेश गरि कर छली गरेको आशंकामा विभागले १ हजार ९६६ फर्म तथा कम्पनीमाथि अनुसन्धान सुरु गरेको थियो । यी फर्मबाट करिब १० अर्ब राजस्व छली भएको अनुमान विभागको थियो ।
आन्तरिक राजस्व विभागका अनुसार कुल १ हजार ९६६ फर्मको फाइल खोलिएकोमा अहिलेसम्म १ सय फाइलको अनुसन्धान सकिएको छ । १ सय वटा फर्ममाथि गरिएको छानबिनबाट उनीहरुलाई ३२ करोड कर तोकिएको छ । उनीहरुले कारोबार नै नगरी भ्याट बिल दाखिला गरि सरकारबाट भ्याट फिर्ताबापतको रकम लिएर राजस्व छली गरेको पाइएको विभाग स्रोत बताउँछ ।
फाइल खोलिएकामध्ये अहिले १ हजार ८६६ फर्म तथा कम्पनीमाथिको छानबिन जारी छ । चैतभित्र यी सबैको छानबिन सकेर कर निर्धारण गर्ने लक्ष्यमा आन्तरिक राजस्व विभाग छ ।
‘वस्तु र सेवाको लेनदेन नभई बिजक मात्रै लिएर १३ प्रतिशत भ्याट सरकारसँग दाबी गर्ने गरेको आशंका लागेपछि १ हजार ९६६ वटा फर्मको फाइल खोलिएको थियो, तिमध्ये १ सय वटाको छानबिन सकिएर ३२ करोड कर निर्धारण भएको छ’ आन्तरिक राजस्व विभाग स्रोतले भन्यो, ‘वस्तु र सेवाको बिक्रिका लागि नभई बिल मात्रै बिक्री गर्न फर्महरु खोलिने गरेको पाइयो ।’
विभाग स्रोतका अनुसार अहिलेसम्म अनुसन्धान सकिएका फर्म तथा कम्पनीमध्ये एउटै कम्पनीले ६÷७ करोडसम्म कर छली गरेको पाइएको छ ।
यसअघि, विभागका महानिर्देशक दीर्घराज मैनालीले कर छली भएको आशंकामा विभिन्न कम्पनीको फाइल ‘रि ओपन’ गरेर अनुसन्धान भइरहेको बिजपाटीलाई जानकारी दिएका थिए । विभागले यो विशुद्ध अनुसन्धान मात्र भएको र यसलाई ‘रि अडिट’ भन्न नमिल्ने बताएको थियो । अहिले भइरहेको अनुसन्धानमा अडिट भएका र नभएका सबै खालका कम्पनी तथा फर्म परेकाले यसलाई ‘रि अडिट’ भन्न नमिल्ने विभागको भनाइ रहँदै आएको छ ।
.gif)
