नेकपा एमालेले पुँजीबजार तथा वित्त बजारको व्यवस्थापनको लागि पार्टी भित्र छुट्टै संयन्त्र बनाउने भएको छ । एमालेले आज डिजिटल माध्यमबाट घोषणापत्र जारी गर्दै पुँजीबजार तथा वित्त बजारको व्यवस्थापनको लागि छुट्टै संयन्त्र बनाउने घोषणा गरेको हो ।
एमालेले घोषणापत्रमा जलविद्युत आयोजना सम्पन्न गर्न सार्वजनिक, निजी र वैदेशिक लगानी जुटाइने उल्लेख गरेको छ । देशको जलस्रोतको लाभ सबै नागरिकमा पुऱ्याउन आकर्षक जलविद्युत् परियोजनामा जनता, सहकारी संस्था र सरकारको संयुक्त लगानी प्रवर्द्धन गरिने घोषणापत्र मा उल्लेख छ। बचत गर्न नसक्ने व्यक्तिहरूलाई पनि यस्ता परियोजनामा सेयर उपलब्ध गराउन विशेष वित्तीय व्यवस्था गरिने एमाल ले जनाएको छ ।
एमालेको घोषणापत्रमा देउबा नेतृत्वको वर्तमान गठवन्धन सरकारले आर्थिक क्षेत्रमा अबलम्बन गरेको बेथिति र अराजकताका कारण अधिकांश आर्थिक परिसूचकहरू निराशाजनक तहमा पुगेका उल्लेख गरिएको छ। घोषणापत्रमा भनिएको छ ' वित्तीय प्रणालीमा ब्याजदर बढेर अघिल्लो वर्षका तुलनामा दोब्बर हुने सङ्केत देखिदैछ । लगानीकर्ताको मनोबल खस्केर सेयर मूल्य निरन्तर घट्दो छ । सम्पूर्ण पुँजी बजार अस्तव्यस्त छ।'
त्यस्तै वित्तीय क्षेत्रमा सङ्कटका सङ्केत देखिन थालेको उल्लेख गरिएको छ। घोषणा पत्रमा भनिएको छ 'बैंकबाट कर्जाका रूपमा बाहिर गएको रकम निक्षेपका रूपमा बैंकमा अहिले फर्कंदैन । घर जग्गा र सेयर बजारको उच्च मूल्यसँगै बैंकिङ प्रणालीबाट बाहिर गएको रकम बैंकमा फर्कन सकेको छैन। अवैध सम्पत्तिलाई वैध बनाउने सरकारकै कतिपय नीति तथा निर्णयका कारण देश सम्पत्ति शुद्धीकरणको चपेटोमा पर्ने डर छ।'
