चितवन निर्वाचन क्षेत्र नम्बर २ का
एमाले उम्मेदवार कृष्णभक्त पोखरेलले लोकतन्त्र सुन्दर फूल फुलाउने चौतारी भएकाले रवि
लामिछानेलाई पनि एउटा फूलका रूपमा चित्रण गरेका छन् ।
ग्राउण्ड जिरो रिपोर्टिङका लागि
चितवनस्थित उनकै घरमा पुगेको बिजपाटी टीमसँग संक्षिप्त भिडियो कुराकानी गर्दै उनले
आफ्ना प्रतिस्पर्धी राष्ट्रिय स्वतन्त्र पार्टीका सभापतिसमेत रहेका लामिछानेलाई
सुन्दर फूलको रूपमा चित्रण गरेका हुन् ।
'रविजी बाहिरबाट चितवन छानेर आउनुभएको छ, म स्वागत गर्छु उहाँलाई,' पोखरेलले भने, 'यो निर्वाचन क्षेत्रका जनताका सुख-दुखमा कति सामेल हुनुहुन्छ, त्यो भने जनताले नै बुझ्ने कुरा हो । लोकतन्त्रको फूलबारीमा धेरै फूलहरू फुल्न पाउँछन । उहाँ पनि एउटा सुन्दर फूलका रूपमा यहाँ आउनुभएको छ ।'
उनले आफूले विगतदेखि नै एउटा कानून
व्यवसायीका रूपमा स्थानीय जनतालाई सहयोग गर्दै आइरहेको बताए । माओवादी जनयुद्धका
बेलामा पनि धेरैलाई कानूनी सहयोग गरेकाले आफूलाई माओवादीको पनि भोट आउने उनको
जिकिर छ ।
'माओवादी केन्द्रका जतिसुकै साथीहरू
हुनुहुन्छ, उहाँहरूलाई युद्धकालदेखि नै मैले
कानून व्यवसायीका रूपमा सहयोग गरिरहेको छु,' पोखरेलले भने, 'कांग्रेसका पनि
राजनीतिक व्यक्तित्वहरूले पनि मलाई भोट हाल्नुहुन्छ भन्ने मलाई विश्वास छ ।'
उनले आफू यो संविधानको मस्यौदाकारका
रूपमा काम गरेको र कानून, न्याय मानवाधिकार समितिको सभापतिको रूपमा कानून निर्माण
गर्ने प्रक्रियामा सामेल हुँदा अल्पमत बहुमत होइन, सर्वसम्मत ढंगबाट काम गरेको दाबी गरे ।
उनले आफ्नो काम मूलतः नीति निर्माण
क्षेत्रमै रहेको तर स्थानीय क्षेत्रको विकास निर्माणमा पनि आफू सामेल रहेको बताए ।
यसअघि दुई पटक सोही क्षेत्रबाट सांसद
जितेका पोखरेल आफ्नो अनुभवकै कारण तेस्रोपटक बिजयी भएर काम गर्ने रहर रहेको उनले
बताए । 'कतिपटकसम्म सांसद बन्ने भन्ने सन्दर्भ नै होइन । नेपाल वा विश्वमा कहीं
कतै कतिपटक चुनाव कति लड्ने भन्ने हुन्न । दुई पटकको अनुभव भनेको अरू थप काम गर्न
मजबुत हुन्छ,' उनले भने ।
उनले आफूसँग प्रतिस्पर्धा गर्ने
सबैप्रति उच्च सम्मान रहेको बताए । 'जो जो साथीहरू उम्मेदवार बन्नुहुन्छ, उहाँहरू सबैप्रति उच्च सम्मान गर्न चाहन्छु,'
उनले भने ।
उनले आफूलाई निर्वाचन जित्न कत्ति पनि कठिनाइ नभएको बताए । 'नेकपा एमाले देशभरिमा नै पहिलो पार्टी हो, त्यसमा पनि यो निर्वाचन क्षेत्रमा गठबन्धन सबै एकातिर र एमाले अर्कोतिर हुँदा पनि हाम्रो नै मत धेरै छ । जनतासँगको नियमित सम्बन्ध र अन्तरघुलन भएका कारण जित्न त्यति अप्ठेरो हुन्छ भन्ने मलाई लाग्दैन,' उनको दाबी छ ।
हेर्नुहोस् भिडियो -