उत्तरी छिमेकी देश चीनसँगको प्रमुख व्यापारिक नाका ‘तातोपानी’ सञ्चालनमा आएको छ । चीनमा कोरोना भाइरसको संक्रमण बढेपछि गत माघदेखि बन्द रहेको तातोपानी नाका बुधबारबाट सञ्चालमना आएको हो ।
सिन्धुपाल्चोकका सहायक प्रमुख जिल्ला अधिकारी बाबुराम खनालका अनुसार अतिआवश्यक सामना आयात गर्न नाका खोलिएको हो । उक्त नाका हुँदै बुधबार १० बाकस सेनिटाइजर र १९ बाकस मास्क नेपाल भित्रिएको छ ।
शुक्रबारबाट ठूला परिमाणमा सामान भन्सार कार्यालयमा आइपुग्नेछन् । उक्त नाका माघ १३ देखि बन्द थियो ।
यसैबीच रसुवागढी नाका भने तत्काल नखुल्ने भएको छ । चीनले रसुवागढी नाका नखोल्ने जानकारी नेपाल सरकारलाई गराएको छ ।
वाणिज्य मन्त्रालयले परराष्ट्र मन्त्रालयमार्फत चैत १२ मा नै तातोपानी र रसुवागढी नाका खोल्न चीन सरकारलाई आग्रह गरेको थियो । नेपालले अनुरोध पत्र पठाएको ९ दिनपछि जवापल दिँदै चीनले तत्कालका लागि तोतोपानी नाका मात्रै खोल्न सकिने जनाएको छ ।