.gif)
किर्ते गरी ललिता निवासको जग्गा हडपेको घटनामा तत्कालिन मालपोत कार्यालय डिल्लीबजारका प्रमुखसहितका थप पाँच जना पक्राउ परेका छन् । आज विहान भाटभटेनी सुपरमार्केटका अध्यक्ष मीनबहादुर गुरुङ पक्राउ परे लगत्तै उनीहरुलाई पनि समातिएको हो ।
नेपाल प्रहरीका केन्द्रिय प्रवक्ता कुबेर कडायतका अनुसार पछिल्लो समयमा पक्राउ पर्नेमा कलाधर देउजा, सुरेन्द्रमान कपाली, धर्मप्रसाद गौतम, हुपेन्द्रमणि केसी र गोपाल कार्की रहेका छन् । देउजा मालपोत कार्यालय डिल्लीबजारका तत्कालिन प्रमुख र कपाली कर्मचारी भएका बताइएको छ ।
विसं २०४९ देखि २०६९ सम्ममा सरकारी स्वामित्वमा रहेको बालुवाटारस्थित ललिता निवासको जग्गा विभिन्न व्यक्तिका नाममा नामसारी भएको फेला परेको थियो । सोही प्रकरणमा सिआइवीले अनुसन्धान गरिरहेको छ ।
ललिता निवास प्रकरणमा यसअघि तीन सय जनालाई प्रतिवादी बनाएर सिआइवीले जिल्ला सरकारी वकिलको कार्यालयमा प्रतिवेदन बुझाएको थियो । तर सरकारी वकीलको कार्यालयले थप अनुसन्धान गर्नुपर्ने जनाउँदै फाइल फिर्ता पठाएको थियो ।
त्यसपछि घटनाको अनुसन्धान प्रक्रिया नै सेलाएर बसेका बेला फेरि सिआइलीले फाइल ओपन गरी घटना उप्काएको छ ।
उक्त घटनाको सन्दर्भमा अख्तियार दुरुपयोग अनुसन्धान आयोगले १७५ जना विरुद्ध अदालतमा मुद्दा दर्ता गरिसकेको छ । मुद्दा अहिले पनि विचाराधिन रहेको छ ।
.gif)
