कम्प्युटर एशोशियन अफ नेपाल (क्यान) महासंघको आयोजनामा राजधानीको भृकुटीमण्डपस्थित प्रदर्शनी हलमा आजदेखि २९औं संस्करणको क्यान इन्फोटेक सुरु भएको छ । बिहिबार सञ्चार तथा सूचना प्रविधिमन्त्री रेखा शर्माले मोबाइलको बटन थिचेर यो प्रदर्शनीको उद्घाटन गरेकी हुन्।
क्यान महासंघका अध्यक्ष रञ्जीत कुमार पोद्दारका अनुसार प्रदर्शनीमा क्यान महासंघका सदस्य संस्थाहरुका साथै विभिन्न राष्ट्रिय र अन्तर्राष्ट्रिय सूचना तथा सञ्चार प्रविधिसम्बन्धी कम्पनीहरूको सहभागिता रहेको छ । पाँच दिनसम्म सञ्चालनमा हुने प्रदर्शनीमा विभिन्न कम्पनीका १५० ओटा स्टल रहेका छन्।
क्यान इन्फोटेकमा नेपालमै विकास भएको एआई जेनेरेटिभ सिस्टमदेखि नेपाली समाजलाई उपयोगी हुने विभिन्न सेवा र उत्पादनको विशेष प्रदर्शनीमा रहेको महासंघका अध्यक्ष पोद्दारले बताए । साथै, यस प्रदर्शनीमा शिक्षा, स्वास्थ्य, कृषि र पर्यटनको क्षेत्रमा प्रयोग भएका नयाँ प्रविधिलाई समेत समावेश गरिएको छ। प्रदर्शनीमा प्रवेश गर्न सर्बसाधारणले रु. १०० र विद्यार्थीले रु. ५० प्रवेश शुल्क तिर्नु पर्ने हुन्छ ।
प्रदर्शनीमा राखिने नवीनतम प्रविधि तथा स्थानीय बजारको मागअनुसार विकास गरिएका प्रतिभा र आविष्कारले डिजिटल नेपाल निर्माणको अभियानलाई सहयोग पुग्ने आयोजकको विश्वास छ ।