अफगानिस्तानको पूर्वी क्षेत्र घान्जि प्रदेशमा भएको कार बम विस्फोटमा परी कम्तीमा १२ जना मारिएका छन् । कतारमा अफगानिस्तानको द्वन्द्व अन्त्य गर्ने बारेमा शान्तिवार्ता भइरहेका बेला अफगानिस्तानमा पछिल्लो समय धेरै विस्फोटका घटना भइरहेका छन् । आइतबार गुप्तचरसम्वन्धी एक कार्यालय नजिकै विस्फोट पनि त्यसैको श्रृङ्खला भएको र विस्फोटनमा परी अरु कैयौं घाइते भएका छन् ।
अमेरिकी सहजकर्ताको समन्वयमा अफगानिस्तानी प्रतिनिधि र तालिवान लडाकूको पक्षबीचमा दोहामा शान्तिवार्ता भइरहेको छ । अफगानिस्तानमा १८ बर्षदेखि जारी द्वन्द्व समाधानका लागि अमेरिकाले प्रयास गरेपनि खासै उपलब्धी हुनभने सकेको छैन ।
विस्फोटमा परी १२ जनाको मृत्यु भएको र १७९ घाइते भएको स्वास्थ्य मन्त्रालयका प्रवक्ता वाहिडुल्लाह मायरले जानकारी दिए । घाइते मध्ये अधिकांश सर्वसाधारण र बालबालिका रहेका छन् ।
