गुहेश्वरी मर्चेन्ट बैंकिंग एण्ड फाइनान्स लिमिटेडले कार्तिक १२ गतेदेखि हकप्रद निष्काशन गर्ने भएको छ । फाइनान्सले १०:४ को अनुपातमा ४० प्रतिशत हकप्रद बिक्रि गर्न लागेको हो । अब फाइनान्सले १९ लाख ७३ हजार ९ सय २८ दशमलव ७७ कित्ता हकप्रद निष्काशन गर्ने छ ।
कम्पनीले हकप्रद प्रयोजनका लागि असोज २७ गते बुक क्लोज गरेकाले असोज २६ गते कायम शेयरधनीले मात्र हकप्रद भर्न सक्ने छन् । हकप्रद निष्काशनको लागि एनआईबिएल क्यापिटल मार्केट्स बिक्रि प्रबन्धक रहेको छ ।
लगानीकर्ताले मङ्सिर १८ गतेसम्म हकप्रद भर्न सक्ने छन् । लगानीकर्ताले बिक्रि प्रबन्धक एनआईबिएल क्यापिटल मार्केट्सको कार्यालय लाजिम्पाट, गुहेश्वरी मर्चेन्ट बैंकिंग एण्ड फाइनान्सको सम्पूर्ण शाखा कार्यालयहरु , र नेपाल इन्भेस्टमेन्ट बैंकको शाखाहरु चिप्लेढुंगा पोखरा, विराटनगर, नारायणगढ, नेपालगंज र धनगढीबाट आवेदन दिन सक्ने छन् ।
हाल कम्पनीको चुक्ता पुंजी ४९ करोड ३४ लाख रहेको छ । हकप्रद निष्काशनपछि चुक्ता पुंजी ६९ करोड १० लाख पुग्ने छ ।
राष्ट्र बैंकको निर्देशन अनुसार राष्ट्रिय स्तरको फाइनान्सले ०७४ असारसम्म चुक्ता पुंजी ८० करोड पुर्याउनु पर्ने छ । कम्पनीले गत आर्थिक बर्षमा १२ करोड ९२ लाख खुद नाफा कमाएको थियो ।
