यस बर्षको कारोबारको अन्तिम दिन बजार परिसूचक नेप्से बढेको छ । आज नेप्से सूचक ४.२२ अंकले बढेर १२७७.५५ को उचाईमा पुगेर रोकिएको छ। यस बर्षभरमा नेप्से सूचक ४१९.५८ अंकले घटेको छ । गत बर्ष चैत्रको अन्तिम दिनको कारोबारमा नेप्से सूचक १६९७.१३ रहेकोमा यस बर्षको चैत्र को कारोबारको अन्तिम दिनसम्म आईपुग्दा सूचक ४१९ अंकले घटेको हो ।
आज कारोबारमा आएका १ सय ६५ कम्पनीका १३ लाख २९ हजार ९ सय ३० कित्ता शेयर खरिद बिक्रिबाट ४४ करोड ३० लाख ९६ हजार २ सय ६६ रुपैयाको कारोबार भएको छ । आज फाइनान्स र बाणिज्य बैंकबाहेकका समुहगत सूचक बढेका छन् ।
आज नबिल बैंकको संस्थापक शेयरको सबै भन्दा धेरै २ करोड ४६ लाख बराबरको कारोबार भएको छ । अन्य बढी कारोबार हुनेमा ओम डेभलपमेन्ट, गुराँस लाइफ इन्स्योरेन्स, प्रिमियर इन्स्योरेन्स लगायत रहेका छन् । आज प्रिमियर इन्स्योरेन्सको शेयर मूल्य सर्बाधिक ६.७४ प्रतिशतले तथा सूर्या लाइफ इन्स्योरेन्सको शेयर मूल्य ५.७९ प्रतिशतले बढेको छ ।
त्यस्तै आज नेपाल लाइफ इन्स्योरेन्सको संस्थापक शेयरको मूल्य सर्बाधिक ९.९२ प्रतिशत घटेको छ भने काबेली बैंकको शेयर मूल्य ३.६७ प्रतिशतले घटेको छ ।
