नेपाल इन्भेस्टर फोरमका अध्यक्ष अम्बिका पौडेलले हल्लाको पछाडी नलाग्न लगानीकर्तालाई आग्रह गरेका छन् । पौडेलले १५ लाख भन्दा बढी लगानीकर्ता र करिब १७ खर्बको बजार कसैले यति पुग्छ उति पुग्दछ भनी भनेको र लेखेको आधारमा घटबढ नहुने भन्दै हल्लाको पछि नलाग्न आग्रह गरेका हुन् ।
उनले बजार कता जान्छ भन्ने बिषय लगानीकर्ताको मनोविज्ञानमा भर पर्ने बताए। उनले भने 'मैले भनेको कुरालाई लिएर गलत प्रचार भयो, बजार सधै घटिरहने वा बढी रहने भन्ने हुदैन, यो त बिशुद्द रुपमा लगानीकर्ताहरुको लगानी सम्बन्धि निर्णयले माथी तल हुने हो।'
साथै उनले पुंजीबजारका आधारभुत सिद्धान्तहरुको अध्ययन गरि विवेकशील तथा व्यावसायिक लगानीकर्ता बन्न पनि सबैमा अपिल गरेका छन् । एक लगानीकर्ताको हिसाबले अनुमान सबैले गर्ने बताउदै उनले भने 'बजार सुधारको बिषयमा जुन पहल भई रहेको छ, यसले बजार अझै माथि जान सक्छ ' उनले बढेको बजारमा लगानीकर्ताले नाफा बुक गर्न खोज्दा आजको बजारमा करेक्सन देखिएको र यो स्वभाविक भएको बताए । तर बजार धेरै करेक्सन नहुने उनको अनुमान छ ।
उनले 'नेप्से सूचक १५ सयको उचाईमा पुगेर तल झर्ने सक्ने' अभिव्यक्ति दिएको भन्ने बिषयले आज निकै चर्चा पाएको थियो । केहि दिन अगाडिदेखि लगातार बढी रहेको र हिजो १४ सय ४० मा बन्द भएको नेप्से सूचक आज दोहोरो अंकले घटेपछि पौडेल बजार घटाउन लागेका हुन् कि भन्दै केहि लगानीकर्ताले आशंका व्यक्त गरेका थिए ।
तर उनले यस बिषयमा आपत्ति जनाउदै बिजपाटीसंग भने 'लगानीकर्ताको हिसाबले १५ सय सम्म पुग्न सक्छ र त्यसपछि केहि करेक्सन होला भनेर मैले अनुमान मात्र गरेको हो, यसलाई नै गलत तरिकाले ठुलो बिषय बनाईयो' । साथै उनले कसैले भनेको भरमा बजार घटबढ नहुने दोहोर्याउदै हल्लाको पछाडी नलागी पुंजीबजारका आधारभुत सिद्धान्तहरुको अध्ययन गरि लगानी गर्न आग्रह गरेका हुन्।