नेपाल स्टक एक्चेन्जले आजदेखि पूर्ण स्व:चालित अनलाइन कारोबार प्रणालीको शुभारम्भ गरेको छ । अर्थमन्त्री डा. युवराज खतिवडाले मंगलबार अनलार्इन कारोबार प्रणालीको उदघाटन गरेका हुन्।
तर अनलाइन ट्रेडिङ उद्घाटन भएकै दिन नेप्सेको साइटमा समस्या आएको छ । नेप्सेको साइट खुलेपनि कारोबारको विवरण भने पुरानै देखिएको छ। अघिल्लो दिन बजार बन्द हुँदाको विवरण नै नेप्सेको साइटमा देख्न सकिन्छ । साइटमा मार्केट ओपन भन्ने सिग्नल देखाए पनि कारोबार विवरण, मार्केट डेप्थ केहि पनि देखिएको छैन । यो समाचार तयार पार्दासम्म नेप्सेको साइटमा आजको डाटा देखिएको छैन ।
सर्भरमा केहि समस्या आएकोले यस्तो भएको नेप्सेले जनाएको छ । नेप्सेका प्रबक्ता मुराहरी पराजुलीले सिस्टमले 'डाटा थ्रो ' नगरेकोले साइटमा अघिल्लो दिन कै विवरण देखिएको बताए । प्राविधिक टिमले यो समस्या समाधन गर्न काम गरिरहेकोले केहि समय मै साइटमा लेटेस्ट डाटा देखिने उनले बताए ।
साइटमा नदेखिए पनि कारोबार भने जारि छ । तर कारोबार जारि रहेपनि आफुहरुले पनि पूर्ण विवरण हेर्न नमिलेको एक ब्रोकरले बिजपाटीलाई बताएका छन् । उनले पुरानोबाट नयाँ सिस्टममा जाँदा विभिन्न कुरा हरु सार्नु पर्ने भएकोले साइटमा समस्या देखिएको हुन् सक्ने बताए। साइटमा नदेखिए पनि शेयर खरिद बिक्रि भने जारी छ ।
अनलाइन ट्रेडिङ सुरु भएको दिन बजार कता जान्छ भन्ने आम लगानीकर्तामा उत्सुकता छ । तर साइटमा भने बजारको विवरण नै नदेखिएकोले लगानीकर्ता यस जानकारी पाउन बन्चित भएका छन् ।