अरुण भ्याली हाइड्रोपावर Arun Valley Hydropower Development Company को हकप्रद शेयर निष्काशनको अनुमति माग्दै नेपाल धितोपत्र बोर्डमा आवेदन दिएको छ । कम्पनीले १ बराबर १ शेयरको अनुपातमा ९९ करोड ८३ लाख रुपैयाँ बराबरको हकप्रद शेयर निष्काशन गर्नको लागि अनुमति माग गर्दै असोज २१ मा बोर्डमा आवेदन दिएको हो ।
हकप्रद शेयर निष्काशनको लागि मुक्तिनाथ क्यापिटल बिक्रि प्रबन्धक रहेको छ । बोर्डबाट अनुमति पाएपछि कम्पनीले प्रतिशेयर १०० रुपैयाँका दरको ९९ लाख ८३ हजार २३२ कित्ता हकप्रद शेयर निष्काशन गर्ने छ । हकप्रद शेयर निष्काशन गरे पश्चात कुल चुक्तापूँजी १ अर्व ९९ करोड ६६ लाख रुपैयाँ पुग्ने कम्पनीले जनाएको छ ।
कम्पनीलाई विद्युत नियमन आयोगले हकप्रद निष्काशनको लागि स्वीकृति दिईसकेको छ । आधारभुत तथा संचालक शेयरधनीहरुले आफ्नो नाममा रहेको हकप्रद शेयर वापतको रकम भुक्तानी गरे पश्चात मात्र सर्बसाधारणलाई हकप्रद शेयर निष्काशन गर्ने शर्तमा कम्पनीले आयोगबाट स्वीकृत पाएको हो ।
कम्पनीले आफुले निर्माण गर्न लागेको २ वटा आयोजनाको लागि रकम जुटाउन हकप्रद निष्काशन गर्न लागेको हो । हकप्रद शेयर मार्फत उपलब्ध भएको रकमलाई कम्पनीले काबेली बी १ जलविद्युत आयोजना र अपर काबेली २ जलविद्युत आयोजना गरी कुल २३.५ मेगावाट आयोजनाको निर्माण कार्यमा उपयोग गर्ने जनाएको छ ।