नेपाल पत्रकार महासंघले प्रहरीले केहि अनलाइन संचार माध्यमलाई समाचारको स्रोत खुलाउन र सम्पादकलाई उपस्थित हुन पत्र काटेको घटनाप्रति आफ्नो गम्भीर ध्यानाकर्षण भएको बताएको छ।
प्रहरीले समाचारको स्रोत सहित सम्पादकलाई उपस्थित हुन पत्र काटेपछी महासंघले आज एक बिज्ञप्ती जारि गर्दै ध्यानाकर्षण भएको जनाएको छ। 'प्रकाशित÷प्रसारित समाचारको स्रोत खोज्ने र समाचारकै विषयलाई लिएर सम्पादकलाई उपस्थित हुन पत्र काट्ने अधिकार प्रहरीलाई नभएको महासंघ स्पष्ट गर्न चाहन्छ' बिज्ञप्तीमा उल्लेख छ।
आमसञ्चारमाध्यममा प्रकाशित/प्रसारित सामग्रीका सम्बन्धमा कुनै गुनासो वा उजुरी भएमा प्रेस काउन्सिलमार्फत समाधान खोज्न महासंघले आग्रह गरेको छ।
यस किसिमका घटनाले सञ्चारमाध्यमलाई निर्वाधरूपमा प्रेस स्वतन्त्रताको उपभोग गर्ने काममा बाधा पुर्याउने महासंघको भनाई छ। यस किसिमका घटना तत्काल रोक्न र यस्ता घटना पुनः नदोहोर्याउन सम्बन्धित पक्षलाई महासंघले आग्रह गरेको छ। साथै प्रेस स्वतन्त्रताविरोधी यस किसिमका घटना नरोकिएमा कठोर संघर्षका कदम चाल्न बाध्य हुने महासंघले चेतावनी दिएको छ।
यस घटनाका बारेमा महासंघले गम्भीर चासो र चिन्ता व्यक्त गर्दै प्रेस काउन्सिल नेपाल, सूचना विभाग, नेपाल बार एसोसिएसन, नेपाल प्रहरीका अधिकारीसँग छलफल गरेको जनाएको छ।
यसैबीच महासंघले सञ्चार सम्वद्ध विभिन्न संस्थाहरू नेपाल प्रेस युनियन, प्रेस चौतारी नेपाल, प्रेस सेन्टर नेपाल, क्रान्तिकारी पत्रकार संगठन, नेपाल, अनलाइन पत्रकार संघसहितका प्रतिनिधिहरूसँग छलफल गरी यस सन्दर्भमा नेपाल सरकार, सुरक्षा निकायको गम्भीर ध्यानाकर्षण गराउने र प्रेस तथा अभिव्यक्ति स्वतन्त्रताको रक्षा, मिडियाको स्रोतको गोपनियताको रक्षाका लागि संयुक्तरूपमा प्रतिवाद गर्ने निष्कर्ष निकालेको छ ।
