राष्ट्रपतिको उम्मेदवार चयन लगायत विषयमा छलफल गर्न नेकपा (एमाले) स्थायी कमिटीको बैठक बस्ने भएको छ ।
निर्वाचन आयोगले फागुन २९ गतेका लागि राष्ट्रपति निर्वाचनको मिति तय गरेकाले सोही विषयमा छलफल गर्न बैठक बस्न लागेको एमाले सचिव गोकर्ण विष्टले जानकारी दिए । वाम गठबन्धन बनाएर प्रदेश र प्रतिनिधि सभाको निर्वाचनमा भाग लिएका एमाले र माओवादी केन्द्रले राष्ट्रपति र उपराष्ट्रपतिमा साझा उम्मेदवार तय गर्ने गरी छलफल सुरु गरेका छन् ।
वर्तमान राष्ट्रपति विद्यादेवी भण्डारीलाई पुनः उम्मेदवार बनाउने अथवा नयाँ उम्मेदवार खोजी गर्ने भन्नेमा आज बस्ने स्थायी कमिटीको बैठकले निर्णय गर्ने एमालेले जनाएको छ ।
राष्ट्रपतिको निर्वाचनमा प्रदेश तथा प्रतिनिधि सभाका सदस्यले मतदान गर्न पाउने भएकाले गठबन्धनसँग स्पष्ट बहुमत भएकाले एमाले बरिष्ठ नेता झलनाथ खनालले आफू राष्ट्रपति बन्न तयार रहेको संकेत गरेका छन् । तर एमालेले राष्ट्रपतिमा वर्तमान राष्ट्रपति भण्डारीलाई नै साझा उम्मेदवार बनाउने विषयमा पनि छलफल गर्ने बुझिएको छ ।
बैठकमा माओवादी केन्द्रसँगको एकता प्रक्रिया, सरकार विस्तार लगायत विषयमा पनि छलफल हुने बताईएको छ । बैठक अपरान्ह ४ बजेपछि बस्ने छ ।