राष्ट्रिय योजना आयोगको उपाध्यक्षमा प्राडा पुष्प कँडेल नियुक्त भएका छन्। मंगलबार बसेको मन्त्रिपरिषद्को बैठकले डा कँडेललाई उपाध्यक्षमा नियुक्त गरेको हो।
त्यस्तै बैठकले आयोगको सदस्यहरुमा डा कृष्णप्रसाद ओली, उषा झा, गिरीबहादुर गुरुङ, सुशील भट्ट, मीनबहादुर शाही र रामकुमार फुयाँललाई नियुक्त गरेको छ । रिक्त भएको २ महिनापछि सरकारले आयोगमा नियुक्ति गरेको हो।
नयाँ सरकार गठनसंगै यस अघिका उपाध्यक्ष डा. स्वर्णिम वाग्लेले राजीनामा दिएका थिए । सरकारले नियुक्त गरेका पदहरु मध्ये प्रधानमन्त्रीले राजिनामा दिएसँगै योजना आयोगको उपाध्यक्ष र सदस्यहरुले पनि राजिनामा दिने प्रचलन छ । योजना आयोगको अध्यक्ष प्रधानमन्त्री हुने हुनाले अध्यक्ष परिवर्तन भएपछि उपाध्यक्षले पनि राजीनामा दिने प्रचलन रहेको हो ।
बजेट तर्जुमा गर्नको लागि योजना आयोगका उपाध्यक्षको बिशेष भूमिका रहन्छ ।
