भावना लामा
चार रोपनि जग्गामा
फैलिएको तरकारी खेति । संगै जोडिएको छ ३ सयको संख्यामा रहेको कुखुराको फार्म । लटरम्म फलेको राता गोलभोडा । संगै छेउको लहरामा झुन्डिएका छन् काँक्रा, सीमी, बोडि । यो तरकारी खेति र
कुखुराको स्याहार गर्न ४ जना खटिएका छन् । उनीहरुलाई यहि काम भ्याईनभ्याई छ । यो वर्णन हो काठमाडौंको काँडाघारी स्थित हरहर महादेवस्थानमा सुवास दाहाल र सुशिल दाहालले हालै सुरु गरेको
व्यवसायिक फर्मको । अचेल तरकारीमा पानी लगाउने,
स्याहारसुसार गर्ने, कुखुरालाई दानापानी खुवाउने, तरकारी टिप्ने, बजारसम्म तरकारी पुर्याउने लगायतको काम दैनिकि बनेको छ दाहाल परिवारको ।
तरकारी खेति संगै कुखुरा
पालन गर्दै आईरहेका यी दुई दाजुभाईको व्यवसायले परिवालाई नै स्वरोजगार बनाएको छ । वैदेशिक
रोजगारीबाट फर्केका दाहाल दाजुभाईले नेपालमै केहि गर्ने सोचका साथ
तरकारी व्यवसाय सुरु गरेका हुन् । वैदेशिक रोजगारीको सिलसिलामा साउदी अरब पुगेका
सुशील दाहालले ७ बर्षसम्म साउदीको कफी सपमा काम गरे । ७ बर्षसम्म विदेशीएका उनलाई नेपालमै केहि गर्ने सोचले नेपाल फर्कि आउन बाध्य बनायो । नेपाल
फर्केर व्यवसायको विभिन्न विकल्पहरु खोज्न थाले ।
उनका आफ्नै दाई सुवास दाहाल
पनि ४ बर्षसम्म कुवेतमा सेक्युरिटी गार्डको रुपमा कार्यरत रहे । उनी पनि नेपालमै केहि गर्ने सोचका साथ नेपाल फर्किए
। आफन्त, साथीभाई र दाजुभाईको सोच तथा सरसल्लाहाबाट तरकारी
व्यवसाय गर्ने निधो गरे । स्थाई घर दोलखा भएका दाहाल दाजुभाईले ५ लाखको
लगानीमा ४ रोपनि जग्गा भाडामा लिएर तरकारी व्यवसाय सुरु गरे । तरकारीमा रासायनिक
मलको प्रयोग गर्नुभन्दा जैविक मल नै प्रयोग गर्ने सोचका साथ कुखुरा पालन गर्ने सोच
बनाए । आम्दानीको स्रोतका
साथसाथै तरकारी बालीमा अन्य मलको लागी लगानी गर्न नपर्ने देखिएपछि कुखुरा पालन पनि
सुरु भयो । ३ सयको संख्यामा कुखुरा अटाउने खोर निर्माण गरी कुखुरा ल्याए ।
व्यवसाय सुरु गरेको ४ महिना मै हाल यी दुई दाजुभाईले आफ्नो फर्मबाट मासिक ७० हजारसम्म कमाउने गरेका छन् । अब निकट भविष्य मै एक हजार वटा लोकल कुखुरा पाल्ने र तरकारी खेतिलाई १५ रोपनीसम्म विस्तार गर्ने उनीहरुको लक्ष्य छ । त्यो पनि एकदम अर्ग्यानिक अर्थात् बिषादी रहित । १५ रोपनीमा तरकारी खेतिलाई विस्तार गरेपछि सिधै उपभोक्ता माझ आफ्नो उत्पादन पुर्याउन काडाघारी मै एउटा तरकारी स्टोर खोल्ने यी दाजुभाईको योजना छ । दाहाल दाजुभाई गर्वका साथ भन्छन् ‘स्टोरमा सस्तो मूल्यमा बिषादी रहित ताजा अर्ग्यानिक तरकारी बेच्छौ र अर्ग्यानिक तरकारीको महत्व बुझाउने योजना छ’ ।
देशमा रोजगारी छैन भन्दै विदेशिनेहरुका लागि प्रेरणाको श्रोत बनेका यी दाहाल दाजु भाई ।
