सरकारले ‘ब्रेन गेन सेन्टर’ स्थापना गरेको छ । विदेशमा रहेका नेपालीको ज्ञान र सीपलाई नेपालको सामाजिक तथा आर्थिक विकासमा प्रयोग गर्ने उद्देश्यले परराष्ट्र मन्त्रालयमा यो सेन्टर स्थापना गरिएको हो । परराष्ट्रमन्त्री प्रदीप ज्ञवालीले सेन्टरको उद्घाटन गरे ।
मन्त्रालयको नीति, योजना, विकास कुटनीति तथा गैरआवासीय नेपाली मामिला महाशाखा अन्तर्गतको केन्द्रले विदेशस्थित नेपाली विज्ञहरूबारे सूचना सङ्कलन गरी उनीहरूसँग सहकार्य गर्ने योजना बनाउनेछ । मन्त्री ज्ञवालीले यसअघि नै विदेशमा रहेका नेपाली विशेषज्ञलाई केन्द्रको सूचना प्रणालीमा दर्ता हुन आह्वान गरेका थिए ।
यस अनुसार ४५० भन्दा बढी नेपाली विज्ञहरु केन्द्रमा आबद्ध भइसकेका छन् । केन्द्रको सञ्चालनमा गैरआवासीय नेपाली सङ्घलगायतका संस्थासँग समन्वय गरिने मन्त्रालयले जनाएको छ ।
