जल तथा मौसम विज्ञान विभागले नेपालमा मनसुन भित्रेको घोषणा गरेको छ । विभागले आज असार ५ गतेदेखि मनसुन नेपाल भित्रिएको घोषणा गरेको हो ।
पूर्वी भेगबाट नेपालमा मनसुन प्रवेश गरी क्रमश मध्य हुँदै पश्चिमतर्फ विस्तार हुने क्रममा रहेको छ र केही दिन भित्रै नेपालभर फैलिने अनुमान गरिएको छ। नेपालमा सामान्यतया मनसुन १० जुनमा प्रवेश गर्ने गर्दछ। यस आधारमा यस वर्षको मनसुन १० दिन ढिलो शुरू भएको छ।
नेपालमा साधारणतया: जुन देखि सेप्टेम्बरसम्म चार महिनाको अवधिलाई दक्षिण एसियाली मनसुनको अवधि भनिन्छ। उक्त समयमा नेपालमा वार्षिक वर्षाको करिब ८०% वर्षा हुने गर्दछ। यस वर्षको मनसुनी वर्षा नेपालको प्रदेश १ , प्रदेश २ , प्रदेश ३ र प्रदेश ५ को केहि पश्चिमी भू-भागहरुमा औसत भन्दा कम वर्षा हुने अनुमान गरिएको छ भने बाकि प्रदेशहरु गण्डकी, कर्णाली र सुदुर पश्चिममा औसत वर्षा हुने अनुमान गरिएको छ ।
स्मरणिय छ, सामान्यतया सरदर वर्षा भन्नाले स्थान विशेषको लामो समयको (करिब ३० वर्ष) औसत वर्षालाई बुझिन्छ। सरदर वर्षाको ९०% देखि ११०% सम्म वर्षालाई सामान्य वर्षा मानिन्छ भने सो भन्दा कम र बढि वर्षा भएमा क्रमश: न्युन वा अधिक वर्षा भएको मनिन्छ।
विभागले मौसमी सुचना तथा थप अपडेटहरु नियमित रुपमा महाशाखाको website www.mfd.gov.np, नोटिस बोर्ड सेवा (१६१८०७०७३३३३३) तथा महाशाखाको twitter एकाउण्ट @DHM_weather बाट प्राप्त गर्न सकिने जनएको छ।
