नेपालमा मनसुन प्रवेश गरेको घोषणा भएको हप्तादिन नाग्दासमेत मनसुन सक्रिय हुन सकेको छैन । न्यूनचापीय रेखा मध्य भारतमै अड्किएकाले नेपालमा मनसुनी गतिविधि बढ्न नसकेको जल तथा मौसम पूर्वनुमान महाशाखाले जनाएको छ ।
मनसुन प्रवेश गरिसके पनि केही दिन सक्रिय र केही दिन कमजोर हुने क्रम चलिरहने महाशाखाको भनाई छ । मनसुन सक्रिय गराउने न्यूनचापीय रेखा तीन–चार दिनमा नेपाल आइपुग्ने अनुमान गरिएको छ ।
महाशाखाले आगामी तीन दिनको मौसम पूर्वनुमान जारी गदै आज देशका पश्चिमी भू–भागमा सामान्यदेखि पूर्ण बदली रही हल्का वर्षाको सम्भावना रहेको जनाएको छ ।
आइतवार देशभर सामान्य बदली रही केही स्थानमा हल्कादेखि मध्यम वर्षाको सम्भावना रहेको बताइएको छ । सोमवार देशैभरी आंशिकदेखि सामान्य बद्ली रही केही स्थानमा हल्कादेखि मध्यम वर्षाको सम्भावना रहेको महाशाखाले जनाएको छ ।