नेपाली काँग्रेसका सभापति शेर बहादुर देउवाले सबै पूर्वप्रधानमन्त्रीहरुसँग टेलिफोनमार्फत कुराकानी गरेका छन् । उनी आफैँले पूर्वप्रधानमन्त्रीहरू लोकेन्द्रबहादुर चन्द, पुष्पकमल दहाल, माधव नेपाल, झलनाथ खनाल, बाबुराम भट्टराईसहित मन्त्रिपरिषद्का अध्यक्ष बनेका तत्कालिन प्रधानन्यायधिश खिलराज रेग्मिसँग टेलिफोनमा संवाद गरेको जानकारी गराएका छन् ।
उनले कुराकानीमा कोरोना भाइरसको संकटका बेला एकै ठाउँमा उभिएर एक्यवद्ध भएर काम गरौँ भन्ने प्रस्ताव आफूले राखेको जानकारी दिएका छन् । उनले भनेका छन्, ‘आजको संकटबाट नेपाल र नेपालीलाई जोगाउन एक्यवद्ध भएर गम्भीर ढंगले कार्य गरौं, अपील गरेको छु ।’
उनले प्रधानमन्त्री केपी शर्मा ओलीसँग भने कुराकानी गरेका छैनन् । यसबारे पूर्वप्रधानमन्त्री समेत रहेका देउवाले कुनै उल्लेख गरेका छैनन् ।
नेपाली काँग्रेसका सह–महामन्त्री प्रकाशशरण महतले शनिबार मात्रै मध्यावधि निर्वाचन गर्नुपर्ने माग गरेका थिए भने काँग्रेस बरिष्ठ नेता रामचन्द्र पौडेलले यसअघि नै सहमतिको सरकार बनाउनुपर्ने सार्वजनिक अभिव्यक्ति दिईसकेका छन् ।