पोखरा सिमराबीच सिँधा हवाई सेवा सुरु हुने भएको छ । गण्डकी प्रदेश सरकार, यती र तारा एयरलाइन्स र जीतपुर सिमरा उपमहानगरपालिकाबीच सिँधा हवाइ सेवा सञ्चालन गर्ने सहमति भएका हो ।
पोखरामा भएको छलफलमा चैत १५ गतेदेखि हप्तामा ३ दिन हवाई सेवा सुरु गर्ने टुङ्गो लागेको हो । गण्डकी प्रदेशका उद्योग पर्यटन, वन तथा वातावरण मन्त्री विकास लम्सालले चैत १५ गते फागु पूर्णिमाको अवसरमा पोखरा र सिमराबीच हवाइ उडान सुरु गर्ने बताएका छन् । उनले गण्डकी प्रदेशले ७ ओटै प्रदेशमा हवाई सञ्जाल जाड्ने योजना बनाएको पनि जानकारी दिएका छन् । पोखराबाट प्रदेश १ को विराटनगरमा हवाइ उडान हुँदै आएकोमा कोरोनाका कारण सेवा अबरुद्ध छ ।
पोखराबाट सिमरामा हुने उडान आइतबार, बुधबार र शुक्रवार हुने छ । सहमतिमा भाडादर पनि तय भएको छ । एक जनाले पोखरा सिमरा उडानका लागि ४ हजार ५ सय रुपैयाँ तिर्नुपर्ने छ । यती एयरले २९ सिटे सानो जहाजबाट सेवा सुरु गर्ने छ ।