काठमाडौँस्थित त्रिभुवन अन्तराष्ट्रिय विमानस्थलमा सवारी साधनको पार्किङ शुल्क बढेको छ । नागरिक उड्डयन प्राधिकरण (क्यान)ले काठमाडौँ एयरपोर्टमा सवारी साधनको पार्किङ शुल्क बढाएको हो ।
प्राधिकरणले मंसिर १ गते (आज बिहिबार) बाटै लागू हुने गरी सवारी साधनको पार्किङ शुल्क बढाएको हो । विमानस्थल सेवा शुल्क नियमावली अनुसार पार्किङ शुल्क बढाइएको प्राधिकरणले जनाएको छ ।
ठेक्का सम्झौता भएकाहरूसँग सम्झौता अवधि कायम रहुन्जले पुरानै दरमा पार्किङ शुल्क लिने र नयाँको हकमा भने नयाँ शुल्क लाग्ने जनाइएको छ ।
बढाइएको शुल्कअनुसार अब मोटरसाइकल र स्कुटर पार्किङ गर्दा प्रतिघण्टा ४० रूपैयाँ तिर्नुपर्नेछ । यसअघि मोटरसाइकल र स्कुटर पार्किङमा प्रतिघण्टा ५ रुपैयाँ मात्रै शुल्क लाग्दै आएको थियो ।
त्यस्तै कार र जीप पार्किङ गर्दा प्रतिघण्टा ८० रुपैयाँ लाग्नेछ । यसअघि २० रूपैयाँ मात्रै लाग्दै आएको थियो ।
मोटरसाइकल र स्कुटर एकदिन भरी नै पार्किङ गर्दा २४० रूपैयाँ लाग्नेछ । त्यस्तै, कार, जीप र टेम्पो एकदिन भरी पार्किङ गर्दा प्रतिदिन ४८० रूपैयाँ लाग्नेछ ।
हल्का सवारी साधन (मिनी बस, माइक्रो बास)को पार्किङ शुल्क प्रतिघण्टा १ सय रुपैयाँ र प्रतिदिन ६ सय रूपैयाँ तोकिएको छ । गह्रौ सवारी साधन (बस ट्रक) पार्किङ गर्दा प्रतिघण्टा १५० रुपैयाँ र दिनभरी पार्किङ गर्दा प्रतिदिन ९ सय रूपैयाँ लाग्नेछ ।
