नेपाल राष्ट्र बैंकले डलर सटहीमा कडाई गरेको छ । राष्ट्र बैंकको विदेशी विनिमय ब्यबस्थापन विभागले बुधबार एक निर्देशन जारी गर्दै डलर सटहीमा कडाई गरेको हो ।
जस अनुसार अब भारत बाहेक अन्य मुलुकहरूको भ्रमणमा जाने नेपाली नागरिकहरूलाई राहदानीबापत प्रति पटक अमेरिकी डलर १,५००।- वा सो बराबरको परिवर्त्य विदेशी मुद्रासम्म सटही सुविधा दिन सकिनेछ । तर, यस्तो सटही सुविधा एक वर्षमा २ पटकमा नबढ्ने गरी मात्र प्रदान गर्न सकिने ब्यबस्था राष्ट्र बैंकले गरेको छ।
त्यस्तै अब राहदानी वापतको सटही सुविधा प्रदान गर्दा निवेदन फाराम भराई लिनु पर्नेछ । सटही सुविधा उपलब्ध गराउँदा श्रोतको स्वघोषणा लिनु पर्नेछ । राहदानीबापतको सटही सुविधा उपलब्ध गराउँदा सम्भव भएसम्म राहदानी बाहक स्वयम् उपस्थित हुनु पर्ने ब्यबस्था राष्ट्र बैंकले गरेको छ । निवेदनको व्यहोरा निम्न अनुसार कायम गरिएको छ ।
' मैले यस राहदानी वापत सटही लिएको एक महिनाभित्र उद्देश्य बमोजिम विदेश यात्रा नगरेमा सो विदेशी मुद्रा बैंकमा दाखिला गर्नेछु । साथै, यस पटकको विदेश भ्रमणको लागि तोकिएको सीमाभन्दा बढी हुने गरी राहदानी वापतको सटही सुविधा अन्य कुनै पनि संस्थाबाट नलिएको र सटही वापतको रकम वैध श्रोतबाट प्राप्त भएको व्यहोरा समेत अनुरोध गर्दछु । झुट्टा विवरण पेश गरी सटही लिएको ठहरेमा प्रचलित ऐन, कानून बमोजिम सजायको भागीदार स्वयम् हुनेछु ।'
