कैलालीको धनगढीमा रहेका बैंकका शाखाहरुमा उद्योगी व्यवसायीहरुले ताला लगाइदिएका छन् । बैंकको ब्याजदर अस्वभाविक रुपमा बढिरहेको भन्दै आन्दोलित उद्योगी व्यवसायीहरुले धनगढीका बैंक शाखाहरुमा तालाबन्दी गरेका हुन् ।
बैंकका शाखाहरुमा तालाबन्दी भएपछि निक्षेप संकलन, भूक्तानी तथा ब्याज संकलनको काम प्रभावित भएको छ ।
कैलाली उद्योग वाणिज्य संघका उपाध्यक्ष पुस्कर ओझाले उद्योगी व्यवसायीहरु बैंकको ब्याजदर बढेर उद्यम व्यवसाय गर्न नसक्ने अवस्थामा पुग्दा पनि राष्ट्र बैंकले ब्याजदर घटाउने उपाय अबलम्बन नगरेको भन्दै आक्रोश व्यक्त गरे । आन्दोलनका कार्यक्रम अन्तर्गत नै उद्योग व्यवसायीले आज बैंकमा पैसा जम्मा नगरेर विरोध जनाएको उनको भनाई छ ।
आन्दोलित उद्योगी व्यवसायीहरुले बैंकका शाखामा प्रवेश गर्ने गेटमा ‘नो डिपोजिट’ लेखिएको कालो ब्यानर पनि टाँगेका छन् ।
