मकवानपुरमा नयाँ उद्योग दर्ता गर्नेको संख्यामा कमी, गत वर्ष तीन प्रकारका मात्रै उद्योग दर्ता

भानुभक्त आचार्य

कार्यालयले आठ प्रकारको उद्योग दर्ता गर्दै आइरहेकोमा गत आ.व.मा तीन प्रकारका मात्रै उद्योग दर्ता भएको जानकारी दिएको छ । उत्पादनमूलक उक सय २०, कृषि तथा वनपैदावरमा आधिारित आठ सय २४, सेवामूलक तीन सय आठ वटा नयाँ उद्योग दर्ता भएका छन् । नयाँ दर्ता भएका सबै साना उद्योग हुन् । नयाँ उद्योग दर्ताबाट कार्यालयले एक करोड ३३ लाख ३३ हजार रुपैयाँ राजस्व संकलन गरेको छ । 

जिल्लामा थपिएका उद्योगहरुको कुल पुँजी दुई अर्ब ५७ करोड १६ लाख ८५ हजार रुपैयाँ रहेको छ भने बार्षिक उत्पादन क्षमता तीन अर्ब ९२ करोड १२ लाख रुपैयाँ बराबर रहेको कार्यालयले जनाएको छ । गतआर्थिक बर्षमा सात सय ५१ महिला र सात सय ९९ पुरुष उद्यमी भएका छन् । थपिएका उद्योगमा महिला दुई हजार पाँच ८५ र पुरुष दुई हजार २२ गरी चार हजार छ सय सात जनाले रोजगारीको अवसर पाएका छन् । 

जिल्लामा वाणिज्यतर्फ थपिएका व्यवसायिक फर्मको कुल पुँजी लगानी ४ अर्ब १८ करोड ३७ लाख रुपैयाँ भन्दा बढी रहेको छ । त्यस्तै गतआ.व.मा व्यवसाय नवीकरण गर्ने सात सय २९, नामसारी गरी लिने सात य ९४, ठाउँसारी गर्ने ४४, उदेश्य थप गर्ने ७९, उद्योगब्यवसायको लगत कट्टा गर्ने एक सय ७५ उद्योग रहेका छन् । पाँच सय ७९ वटा व्यावसायिक फर्मको पुँजि लगानी तीन अर्ब सात करोड ६९ लाख रुपैयाँ भन्दा बढी छ । 

मकवानपुर उद्योग वाणिज्य संघका अध्यक्ष कृष्णकुमार गुप्ता अग्रवालले संघले महिला उद्यमीलाई तालिम, उत्पादन, बजारीकरणलगायतका क्षेत्रमा सघाउने गरेको बताउँछन् । पछिल्ला दिनहरुमा घरेलु उद्योगमा काम गर्ने दक्ष जनशक्तिको अभावका कारण घरेलु उद्योगप्रतिको आकर्षण बढ्न नसकेको अध्यक्ष अग्रवालको धारणा छ । 

फर्निचर, टेलरिङ, मेटल वक्र्स, हस्तकलाका सामग्री उत्पादन गर्ने उद्यमीले दक्ष जनशक्ति भारतीय बजारबाट ल्याएर उत्पादन गरिरहेको अध्यक्ष अग्रवालले बताए । संघले युवालाई लक्षित गरेर बिभिन्न प्रकारका तालिम दिने काम गरिरहेको भएपनि घरेलु उद्योगमा आकर्षण बढ्न नसकेको अग्रवालले बताए । घरेलु तथा साना उद्योग कार्यालयले आवश्यक सूचना समयमै उद्योग वाणिज्य संघमार्फत् उपलब्ध गराउने गरेको कार्यालयले जनाएको छ । 

हेटौंडा उपमहानगरपालिकाकी प्रमुख मीना लामाले नगरपालिकाले उद्यमशीलतालाई प्रोत्साहन गर्ने कार्यक्रमहरु संचालन गरिरहेको बताइन् । उपमहानगरपालिकाले महिला उद्यमीलाई सघाउने काम गरिरहेको बताउँदै नगरप्रमुख लामाले उद्यमशीलता विकासको लागि आफूहरु लागिरहेको बताइन् । नगरक्षेत्रमा भएका घरेलु उद्योगको स्तरीकरण गर्न बिशेष प्याकेजको रुपमा कार्यक्रम ल्याउन जरुरी रहेको नगरप्रमुख लामा बताउँछिन् ।