.gif)
पाठ्यक्रम विकास तथा मूल्याङ्कन परिषद्ले स्वीकृत गरेको नयाँ पाठ्यक्रम संरचनाले २ विषय थप गरेको छ। अहिलेसम्म ५ विषय पढाइ हुने गरेकोमा आउँदो शैक्षिक सत्रदेखि कक्षा ११ र १२ मा ७ विषय पढाइ हुने भएका छन्।
विज्ञान, शिक्षा, व्यवस्थापन, मानविकीजस्ता छुट्टाछुट्टै संकाय नभई ११ र १२ विद्यालय शिक्षाअनुसार नै संकायविहीन बनाइएको छ। ११ र १२ पढ्ने विद्यार्थीले नेपाली, अंग्रेजी, सामाजिक र जीवन उपयोगी शिक्षा अनिवार्य र ३ ऐच्छिक विषय पढ्नुपर्नेछ।
त्यस्तै यस अघि ११ र १२ मा अनिवार्यबाट हटाइएको गणित ऐच्छिक बिषयमा राखिएको छ। गणित विषय अनिवार्यबाट हटाइएकोमा विरोध हुँदै आएको थियो। अब जीवन उपयोगी शिक्षाको सट्टा गणित पढ्न पाइनेछ।
नयाँ पाठ्यक्रम संरचना स्वीकृत भैसकेको र यही वर्ष कक्षा ११ मा नमूनाका रुपमा लागू हुने पाठ्यक्रम विकास केन्द्रका कार्यकारी निर्देशक कृष्णप्रसाद काप्रीले बताए।
काप्रीका अनुसार कक्षा ९ र १० मा अहिलेसम्म ८ विषय पढाइ गरिएकोमा आउँदो शैक्षिक सत्रदेखि भने ७ विषय मात्रै पठनपाठन हुदैंछ। स्वास्थ्य तथा जनसंख्या विषय हटाइने भएको छ। पाठ्यपुस्तक तयार गर्दा विज्ञानमा प्रविधि सम्वन्धिका पनि विषयवस्तुहरु समावेश गर्ने तयारी गरिएको हो। ५ विषय अनिवार्य छ भने २ विषय ऐच्छिक हुनेछ।
कक्षा ६ देखि ८ सम्म पढाइ हुँदै आएको नागरिक वा पेशाव्यवसाय विषय हटाइएको छ। यद्दपी काप्रीले विषयलाई घटाएको बढाएको भन्दा पनि ती पहिल्यै रहेका विषयमा मिल्ने विषयबस्तु समावेश गरिएको बताए। कक्षा १ देखि ३ सम्म विषयगत शिक्षण गर्ने गरी पाठ्यक्रम तयार गरिएका छन्।
उनका अनुसार कक्षा १ मा भर्ना हुनुभन्दा पहिले पूर्वबालकक्षा शिक्षालाई पनि थप व्यवस्थित बनाउन लागिएको छ। बालबालिकालाई मनोरञ्जनका लागि समय छुट्टाइएको छ।
शिक्षा, विज्ञान तथा प्रविधि मन्त्रालयले प्राविधिक र व्यवसायिक शिक्षालाई जोड दिएअनुसार नै पाठ्यक्रम बनाइएका हुन्। जीवन उपयोगी शिक्षामा स्थानीय तहहरुले आफ्ना आवश्यकताअनुसार विषय छनौट गरी शिक्षा दिन सक्छन्। विद्यालय तह संविधानअनुसार नै स्थानीय तह अन्तर्गत छ।
.gif)
