नेकपा एमालेका सचिव समेत रहेका प्रतिनिधि सभाका सांसद योगेश भट्टराईले विद्यालयमा पाठ्यपुस्तक नपुग्नुमा सरकार दोषी रहेको बताएका छन् । उनले त्रैमासिक परीक्षा आउन लाग्दा पनि विद्यालयमा पाठ्यपुस्तक नपुग्नुमा सरकार दोषी रहेको आरोप लगाएका हुन् ।
‘निजी क्षेत्रबाट छापिएका १ देखि ३ कक्षा सम्मका पुस्तक पुगेको छ, जनक शिक्षाले छाप्ने कक्षा ४ देखि १० सम्मको पुस्तक पुगेको छैन’ उनले संसदमा भने ।
काठमाडौंका ३० प्रतिशत सामुदायिक विद्यालयमा समेत पुस्तक नपुगेको उल्लेख गर्दै सांसद भट्टराईले ‘ढुवानी सहज भएका ठाउँमा पनि पुस्तक पुगेको छैन, दुर दराजको हालत झन के होला ?’ भने ।
समयमै पुस्तक उपलब्ध नहुँदा विद्यार्थीहरु विद्यालय नजाने अवस्था आएको पनि उनले सुनाए ।
‘प्रथम त्रैमासिक परीक्षाको समय आएको छ । विद्यार्थीले के लेखेर परीक्षा दिन्छन् ?’ भन्ने प्रश्न गर्दै नेता भट्टराईले सरकारको जवाफ मागे ।
