रसुवागढी जलविद्युत आयोजनाले असारबाट विद्युत उत्पादन सुरु गर्ने लक्ष्यसहित काम भइरहेको छ । १११ मेगावाटको यो जलविद्युत आयोजनाको भौतिक प्रगति अहिले ९६ प्रतिशत पुगेको छ।
रसुवा जिल्लाको गोसाइकुण्ड गाउँपालिका १ थुमन र २ टिमुरेको सिमाना हुँदै बग्ने भोटेकोशी नदीमा बनिरहेको यो आयोजनाबाट असार मसान्तसम्ममा विद्युत उत्पादन गर्ने लक्ष्य लिइएको छ। आयोजना ३ सिफ्टमा काम भइरहेको छ ।
आयोजनाका सूचना अधिकारी नरनाथ न्यौपानेका अनुसार आयोजनाको संसोधित कूल लागत अनुमान निर्माण अवधिको ब्याजबाहेक १७ अर्ब १ करोड हुने देखिएको छ। ब्याज रकम समेत कुल २१ अर्ब १५ करोड ३२ लाख ६७ हजार रुपैयाँ पुग्ने देखिएको छ ।
आयोजनाको प्रतिमेगावाट लागत निर्माण अवधिको ब्याज रकमसमेत १९ करोड ५ लाख ७० हजार हुने देखिएको छ।
यो आयोजनाबाट वार्षिक ६१ करोड ३८ लाख ७५ हजार युनिट विद्युत उत्पादन हुने छ । कम्पनीलाई वार्षिक ३ अर्ब २५ करोड आम्दानी प्राप्त हुने अनुमान छ।
२०७९ चैत मसान्तसम्म १५ अर्ब ३३ करोड रुपैयाँ खर्च भएको छ ।