पञ्चेश्वर विकास प्राधिकरणको सञ्चालक समिति (गभर्निङ बडी) को बैठकले आयोजनाको विस्तृत आयोजना प्रतिवेदन (डिपिआर) लाई तीन महिनाभित्र अन्तिम रुप दिने सहमति गरेको छ। बैठकले आयोजनाको विस्तृत आयोजना प्रतिवेदन (डिपिआर) लाई तीन महिनाभित्र अन्तिम रुप दिने एवम् सो प्रतिवेदनको कार्यान्वयनमा सघाउ पुऱ्याउन दुवै देशको सरकारद्वारा गठित विज्ञ समूह ( टिम अफ एक्सपर्ट्स/अफिसियल) को म्याद छ महिना थप गर्ने निर्णय गरेको हो ।
त्यस्तै बैठकले पञ्चेश्वर विकास प्राधिकरणका दुवै देशका कार्यकारी समितिका सदस्यहरुलाई प्राधिकरणको प्रमुख कार्यालय, महेन्द्रनगरमा एक महिनाभित्र खटाउने निर्णय गरेको छ । साथै विज्ञ समूहको चौथौं बैठक आगामी दश दिनभित्र आयोजना गर्ने सहमति बैठकले गरेको छ । साथै, बैठकले आर्थिक वर्ष सन् २०१९, २०२०, २०२१ र २०२२ को बजेट अनुमोदन तथा आर्थिक वर्ष २०२३ को वजेट समेत स्वीकृत गरेको छ ।
प्रधानमन्त्रीको हालसालै भएको भारत भ्रमणको अवसरमा पञ्चेश्वर बहुउद्देश्यीय आयोजनाको तीन महिनाभित्र विस्तृत आयोजना प्रतिवेदनलाई टुङ्गो लगाउने दुई देशका प्रधानमन्त्रीहरुबीच भएको सहमतिलाई यथाशीघ्र कार्यान्वयन गर्न यी सहमति भएको उर्जा मन्त्रालयले जनाएको छ ।