चालु आर्थिक वर्षको ८ महिनामा १९ सय केजी सुन आयात भएको छ । भन्सार विभागका अनुसार चालु आवको फागुन मसान्तसम्म १९ सय १ केजी ८६४ ग्राम सुन नेपाल आयात भएको हो ।
उक्त सुन आयातबाट १६ अर्ब १२ करोड २५ लाख ८२ हजार रुपैयाँ विदेशिएको छ भने २ अर्ब ४१ करोड ८४ लाख रुपैयाँ राजस्वमा योगदान पुगेको छ ।
उक्त आयात भएको सुन मध्ये ४०० केजी फागुन महिनामा मात्र आयात भएको विभागको तथ्यांकले देखाउँछ । विभागका अनुसार यो अवधिमा नेपालमा यूनाईटेड अरब ईमिरेट्स, टर्की र भारतबाट सुन आयात भएको छ । जसमध्ये सबैभन्दा धेरै यूएईबाट आयात भएको छ ।
यूएईबाट १८ सय केजी ५०० ग्राम सुन आयात हुँदा टर्कीबाट १०० केजी र भारतबाट १ केजी ३६४ ग्राम सुन आयात भएको छ ।