नेपाल स्टक एक्सचेन्ज नेप्सेमा चिलिमे जलविद्युत कम्पनी Chilime Hydro power Company Limited को शेयरमूल्य समायोजन भएको छ । कम्पनीको १० प्रतिशत बोनसमा मूल्य समायोजन भएको हो ।
समायोजनपछि कम्पनीको शेयर मूल्य ५७० कायम भएको छ । समायोजन अघि कम्पनीको शेयर मूल्य ६२७ थियो । कम्पनीले साधारणसभा प्रयोजनको लागि आज बुक क्लोज गरेकोले आज मूल्य समायोजन भएको हो । मङ्सिर २८ गतेसम्म कायम शेयरधनीले मात्र साधारणसभामा भाग लिन र लाभांश पाउन सक्ने छन् ।
कम्पनीले पुस १२ गते कम्पनीको रजिस्टर्ड कार्यालय धुम्बाराहीबाट भर्चुअल माध्यम मार्फत हुने गरि सभा आह्वान गरेको हो । कम्पनीको साधारणसभा लाभांश सहितका विभिन्न प्रस्ताव पेश हुने छन् । कम्पनीले आर्थिक वर्ष ७६/७७ को मुनाफाबाट हाल कायम चुक्ता पुँजीको १० प्रतिशत बोनस शेयर र १० प्रतिशत नगद (कर प्रयोजनको लागि समेत) गरि कुल २० प्रतिशत लाभांश वितरण प्रस्ताव गरेको छ । कम्पनीको साधारणसभाले पारित गरेपछि लगानीकर्तामा उक्त लाभांश वितरण हुने छ ।
त्यस्तै कम्पनीको साधारणसभामा संचालक समितिको प्रतिवेदन उपर छलफल गरि पारित गर्ने, लेखापरीक्षक प्रतिवेदन, वासलात र अन्य वित्तीय विवरण छलफल गरि पारित गर्ने, लेखापरीक्षकको नियुक्त गरी निजको पारिश्रमिक तोक्ने , र कम्पनीको प्रबन्धपत्र र नियमावलीमा आवश्यक संशोधन गर्ने लगायतका प्रस्ताव पेश हुने छन् ।
