सिडीएसले अनलाइन मिडियाहरुलाई आईपिओको नतिजा प्रकाशन गर्न रोक लगाएसंगै सिडीएसको मेरो शेयरमा चाप परेको छ । मेरोशेयरमा लोड बढे संगै लगानीकर्ताले सहज रुपमा मेरोशेयर खोल्न पाएका छैनन् ।
मेरोशेयरमा समस्या आउँदा लगानीकर्ताहरु बिना कारण क्लोज आउटमा पर्न सक्ने देखिएको छ । लगानीकर्ताहरुले बिहिबार बेचेको शेयरको आज शुक्रबारसम्म डिआईएस अर्थात शेयर ट्रान्सफर गरिसक्नु पर्ने छ । यदि नगरेमा लगानीकर्ताले २० प्रतिशत जरिवाना तिर्नु पर्ने ब्यबस्था छ । अधिकांश लगानीकर्ताले मेरो शेयरमा रहेको ईडिआईएस सेवा मार्फत शेयर ट्रान्सफर गर्दै आएका छन् । तर मेरोशेयर नचल्दा लगानीकर्ताहरु क्लोज आउटको जरिवानामा परिने हो कि भन्दै चिन्तित भएका छन् ।
आईपिओको नतिजा विस्तारै अन्य दिनमा पनि हेर्न सकिने भएपनि शेयर ट्रान्सफरको लागि पर्खन मिल्दैन । ५ वटै लगानीकर्ता संघहरुले पनि गत बुधबार मात्र लगानीकर्ताको कमीकमजोरी नहुदा नहुदै मेरोशेयर कै कारण लगानीकर्ताहरु क्लोज आउटमा पारेर दैनिक करोडौ घाटा बेहोर्नु परेको उल्लेख गरेका थिए । अहिले सो समस्या झन् बढ्ने देखिएको छ ।
साथ साथै लगानीकर्ताहरुले आईपिओको नतिजा हेर्न सास्ती बेहोरेका छन् । आईपिओको नतिजा हेर्नको बिक्रि प्रबन्धकले तयार पारेको वेबसाइट यो समाचार तयार पार्दासम्म खुलेको छैन ।
सिडीएससीले आईपिओ निष्काशन गर्ने कम्पनीको वेबसाइट, बिक्रि प्रबन्धकको वेबसाइट र सिडीएससीको मेरो शेयर मार्फत मात्र आईपिओको नतिजा हेर्न सक्ने ब्यबस्था गरेको हो । यस अघि लगानीकर्ताहरुले सहज रुपमा विभिन्न आर्थिक अनलाइन मिडिया मार्फत सहज रुपमा आफुलाई आईपिओ परेको वा नपरेको हेर्ने गरेका थिए । आईपिओको नतिजा आउँदा मेरोशेयर वेबसाइटमा समस्या आउने भएकोले लगानीकर्तालाई अनलाइन मिडियामा नतिजा हेर्न सहज भएको थियो । अब भने सिडीएसले लगानीकर्ताको गोपनियताको हकको रुपमा रहेकोले आधिकारिक निकायलाई मात्र नतिजा दिने भएको हो ।
