एनएमबि क्यापिटलले निष्काशन गरेको सामुहिक लगानी कोष योजनाको ईकाईमा आवेदन दिने म्याद थप भएको छ । क्यापिटलले साउन २६ गतेदेखि एमएमबि म्युचुअल फण्ड अन्तर्गत संचालन हुने एनएमबि सुलभ इन्भेष्टमेन्ट फण्ड २ को इकाई निष्काशन गरेको हो।
यी इकाईमा लगानीकर्ताले छिटोमा साउन ३१ गतेसम्म आवेदन दिने ब्यबस्था रहेकोमा पर्याप्त आवेदन नपरेपछि अब ढिलोको मिति अर्थात् भदौ ९ गतेसम्म आवेदन दिन सकिने क्यापिटलले जनाएको छ । यो योजनाको आकार १ अर्ब २० करोड अर्थात् १२ करोड इकाई बराबरको रहेको छ ।
प्रति इकाई मूल्य रु.१० दरको १२ करोड इकाई मध्ये १४ प्रतिशत इकाई अर्थात्क १ करोड ६८ लाख इकाई कोष प्रवर्द्धक कम्पनी एनएमबि बैंक लिमिटेड तथा १ प्रतिशत इकाई अर्थात १२ लाख इकाई योजना व्यवस्थापक कम्पनी एनएमबि क्यापिटल लिमिटेडले लगानी गर्ने छ । एक करोड ८० लाख इकाई बराबर बीज पूँजी बाहेक बाँकी रहेको १० करोड २० लाख इकाईको लागि सर्वसाधारणले आवेदन दिन सक्ने छन्। आवेदन दिंदा न्युनतम १०० इकाई र अधिकतम १ करोड २० लाख इकाईको आवेदन दिन सकिने छ।
क्यापिटले योजनाको इकाई निष्काशन गर्नको लागि साउन ५ गते नेपाल धितोपत्र बोर्डबाट अनुमति पाएको हो । यो बन्दमुखी म्युचुअल फण्ड योजना हो ।
हाल क्यापिटलले ३ वटा म्युचुअल फण्ड योजना संचालन गरिरहेको छ। क्यापिटलले बन्दमुखी तर्फ एनएमबि हाइब्रिड फण्ड एल १ , र एनएमबि ५० योजना संचालन गरिरहेको छ भने खुलामुखी तर्फ एनएमबी सरल बचत फण्ड ई संचालन गरिरहेको छ।
