निर्वाचन आयोगको निर्देशनपछि नेपाल क्रेडिट एण्ड कमर्सियल बैङ्क (एनसीसी बैंक) को साधारणसभा अनलाइन माध्यमबाट संचालन हुने भएको छ । आयोगले सभा नगर्न निर्देशन दिएपछि बैंकले आचारसंहिताको पालना हुने गरि भर्चुअल माध्यमबाट सभा संचालनको लागि अनुमति माग गरेको थियो ।
बैंकको अनुरोध बमोजिम नै आयोगले बैंकलाई यस अघि तोकिएको मिति मै भर्चुअल माध्यमबाट साधारणसभा संचालन गर्ने सहमति दिएको छ । यस सँगै बैंकको साधारणसभा मङ्सिर २ गते नै तोकिएको समयमा भर्चुअल माध्यमबाट हुने छ ।
यस अघि आयोगले राजनीतिक कारण देखाउदै बैंकको साधारणसभा स्थगित गर्न निर्देशन दिएको थियो । बैंकका संचालक रहेका मोहन बहादुर बस्नेत सिन्धुपाल्चोक जिल्ला क्षेत्र नं. २ का प्रतिनिधि सभा सदस्यका उम्मेदवार छन् । उनी कांग्रेसका तर्फबाट पूर्वमन्त्री तथा हाल केन्द्रीय सदस्य समेत हुन् । उम्मेदवार नै सञ्चालक रहेको बैंकको साधारण सभा आगामी मंसिर २ गते काठमाण्डौमा सम्पन्न हुने गरी आयोजना गरिएको र मौन अवधि शुरु भइसकेपछि ठूलो संख्यामा मानिसहरु भेला गराई राजनीतिक प्रभाव पार्ने उद्देश्यले भोजभतेर समेतको व्यवस्था गरी साधारण सभा गर्दा निर्वाचन आचारसंहिता उल्लङ्घन हुनुको साथै सार्वजनिक शान्ति र सुव्यवस्थामा समेत खलल पर्न सक्ने अवस्थाको स्पष्ट विद्यमानता देखिएको भन्दै सभा रोक्न उजुरी परेको आयोगले जनाएको थियो।
निर्वाचन (कसूर तथा सजाय) ऐन, २०७३ को दफा २४ को उपदफा (५) मा “कसैले पनि मतदान हुने दिनभन्दा अठ्चालीस घण्टा अघिदेखि मतगणनाको काम पूरा नभएसम्म कुनै उम्मेदवार वा राजनीतिक दलको पक्ष वा मतदान गर्ने वा नगर्ने उद्देश्यले सभा बोलाउन वा आयोजना गर्न, जुलुस निकाल्न वा नाराबाजी गर्न तथा अन्य कुनै पनि प्रकारले प्रचारप्रसार गर्न वा गराउन हुँदैन” भन्ने व्यवस्था रहेको भन्दै आयोगले बैंकलाई साधारणसभा स्थगित गर्न निर्देशन दिएको थियो । अब भने आयोगले बैंकलाई भर्चुअल माध्यमबाट सभा संचालन गर्न अनुमति दिएको छ ।
बैंकले शेयरधनीहरुलाई मङ्सिर २ गते बिहान १० बजे भर्चुअल माध्यम मार्फत साधारणसभामा जोडिन आग्रह गरेको छ ।
सभामा लाभांश सहितका विविध प्रस्ताव पेश हुने छन् । बैंकले आर्थिक वर्ष ७८/७९ को मुनाफाबाट हालको चुक्ता पूँजी एघार अर्ब तेह्र करोडको ३.३६६३ प्रतिशतले हुन आउने सैंतीस करोड पचास लाख बराबरको बोनश शेयर र चुक्ता पूँजीको ७.६३३७ प्रतिशतले हुन आउने पचासी करोड तीन लाख चौसठ्ठी हजार पाँच सय बयासी रूपैया नगद लाभांश गरि कुल ११.२९६७ प्रतिशत लाभांश बितरण गर्ने प्रस्ताव गरेको छ । साधारणसभाले पारित गरेपछि उक्त लाभांश लगानीकर्तामा बितरण हुने छ ।
हाल एनसीसी बैंक र कुमारी बैंक मर्जर प्रक्रियामा छन् । मर्जर प्रक्रियामा रहेको बैंकको शेयर कारोबार असोज ११ गतेदेखि रोक्का छ । कार्तिक १५ गतेसम्म बैंकको शेयर दर्ता किताबमा कायम शेयरधनीले मात्र सभामा भाग लिन र प्रस्तावित लाभांश पाउँ सक्ने छन् ।
यस्ता छन् बैंकको साधारणसभामा पेश हुने प्रस्तावहरु ।
सामान्य प्रस्ताव
१. सञ्चालक समितिको पच्चीसौं वार्षिक प्रतिवेदन ।
२. आर्थिक वर्ष २०७८/७९ को लेखापरीक्षकको प्रतिवेदन सहितको वासलात, नाफा-नोक्सान हिसाब र सोही अवधिको नगद प्रवाह लगायतका संलग्न अनुसूचीहरु समेतको स्वीकृत वित्तीय विवरणहरु स्वीकृत गर्ने सम्बन्धमा ।
३. बैंक तथा वित्तीय संस्था सम्बन्धी ऐन, २०६३ को दफा ६० तथा कम्पनी ऐन, २०६३ को दफा १११ अनुसार आर्थिक वर्ष २०७९/८० को लागि लेखापरीक्षकको नियुक्ति र निजको पारिश्रमिक निर्धारण
गर्ने ।
४. सञ्चालक समितिले प्रस्ताव गरी नेपाल राष्ट्र बैंकबाट स्वीकृत भए बमोजिम चुक्ता पूँजी रू. ११,१३,९६,७८,०१४।- (अक्षरेपी एघार अर्ब तेह करोड छयानब्बे लाख अठहत्तर हजार चौध रूपैया मात्र) को ३.३६६३ प्रतिशतले हुन आउने रू. ३७,५०,००,०००।- (अक्षरेपी सैंतीस करोड पचास लाख मात्र) बराबरको बोनस शेयर र चुक्ता पूँजीको ७.६३३७ प्रतिशतले हुन आउने रू. ८५,०३,६४,५८२।- (अक्षरेपी पचासी करोड तीन लाख चौसठ्ठी हजार पाँच सय बयासी रूपैंया मात्र) नगद लाभांश (लाभांशमा लाग्ने कर समेत) गरी जम्मा ११ प्रतिशत लाभांश वितरणको प्रस्ताव स्वीकृति प्रदान गर्ने सम्बन्धमा ।
विशेष प्रस्तावहरू:
१. आर्थिक वर्ष २०७८/७९ को मुनाफाबाट चुक्ता पूँजी को ३.३६६३ प्रतिशतले हुन आउने रू. ३७,५०,००,०००।- (अक्षरेपी सैंतीस करोड पचास लाख मात्र) बराबरको बोनस शेयर जारी गर्ने विशेष प्रस्ताव पारित गर्ने । साथै, बोनस शेयर जारी पश्चात कायम हुने भिन्न अंक (Fraction) लाई भविष्यमा समायोजन गर्ने गरी यथावत राख्ने सम्बन्धमा ।
२. बैंकको प्रबन्धपत्रमा देहाय बमोजिम संशोधन गर्ने ।
२.१. प्रबन्धपत्रको दफा ५ मा रहेको पूँजीगत संरचनामा देहाय बमोजिम संशोधन गर्ने सम्बन्धमा ।
(क) बैंकको अधिकृत पूँजी रू. ११,५१,४६,७८,०१४।- हुनुपर्ने भएकोले सोही बमोजिम संशोधन गर्ने ।
(ख) बैंकको तत्काल जारी गर्ने शेयर पूँजी वृद्धि गरी रू. ११,५१,४६,७८,०१४।- पुग्ने भएकोले सोही बमोजिम संशोधन गर्ने ।
(ग) बैंकको चुक्ता पूँजी वृद्धि गरी रू. ११,५१,४६,७८,०१४।- पुग्ने भएकोले सोही बमोजिम संशोधन गर्ने ।
३. बैंकको प्रबन्धपत्रमा भएका संशोधन सम्बन्धी विशेष प्रस्तावहरु सम्बन्धित नियामक निकायबाट स्वीकृति लिने क्रममा उक्त निकायहरुको निर्देशन अनुसार फेरबदल, परिमार्जन, थपघट गर्नु परेमा सो कार्य गर्नका लागि सञ्चालक समितिलाई अख्तियारी प्रदान गर्ने ।
४. बैंकको साधारण सभाले यस बैंक र अन्य उपयुक्त बैंक तथा वित्तीय संस्थाहरू एक आपसमा गाभ्ने र गाभिने (मर्ज) वा प्राप्ति (एक्वीजिशन) गर्न, वैदेशिक रणनीतिक साझेदारीमा जान उपयुक्त देखिएमा बैंकको चल अचल सम्पत्ति र दायित्व तथा कारोबारको मूल्याङ्कन गर्न राष्ट्रिय वा अन्तर्राष्ट्रिय मान्यता प्राप्त मूल्याङ्कनकर्ता नियुक्ति गर्न तथा गाभ्ने वा गाभिने वा प्राप्ति गर्ने सम्बन्धी सहमति/सम्झौता गर्ने तथा सो सम्बन्धमा प्रचलित कानून, नियम अनुसार बैंकको तर्फबाट गर्नुपर्ने सम्पूर्ण कार्य गर्न सञ्चालक समितिलाई अख्तियारी प्रदान गरे अनुरुप सञ्चालक समितिबाट गठित मर्जर समिति तथा सो ले गरेका कार्य अनुमोदन गर्न, नयाँ मर्जर समिति गठन गर्न, मर्ज वा प्राप्तिको सम्बन्धमा DDA नियुक्त गर्न र निजको पारिश्रमिक तोक्ने लगायतका प्रक्रिया अवलम्वन गरी अन्य कुनै बैंक तथा वित्तीय संस्थाहरू एक आपसमा गाभ्ने र गाभिने (मर्ज) वा प्राप्ति (एक्वीजिशन) गर्नको लागि सञ्चालक समितिलाई आवश्यक सम्पूर्ण अख्तियारी प्रदान गर्ने ।
।
