सेयर लगानीकर्ताहरु नयाँ स्टक एक्सचेञ्जको माग गर्दै नेपाली काँग्रेसका सभापति शेर बहादुर देउवालाई भेट्न पुगेका छन् । लगानीकर्ताका संघहरुले नयाँ स्टक एक्सचेन्ज र कमोडिटी एक्सचेन्ज चाहिने सहितका ६ बुँदे माग देउवालाई थमाएका छन् ।
नयाँ स्टक एक्सचेन्ज र कमोडिटी एक्सचेन्जको लाइसेन्स वितरण प्रक्रिया अघि बढाउने वातावरण मिलाइदिन देउवा समक्ष लगानीकर्ता नेताहरुले आग्रह गरेका छन् ।
उनीहरुले सेयर धितो कर्जामा १२ करोडसम्मको सीमाले निरुत्साहित पारेको भन्दै यो व्यवस्था हटाउन पहल गरिदिन पनि माग गरेका छन् । सेयर कर्जामा लगाईएको १५० प्रतिशतको जोखिम भारलाई यसअघिकै जस्तो १ सय प्रतिशत मात्रै कायम गरिदिन पनि माग गरेका छन् ।
अल्पकालिन लगानीकर्तालाई ५ प्रतिशत र दीर्घकालीन लगानीकर्तालाई ३ प्रतिशत पुँजीगत लाभकर लगाउनुपर्ने, अहिलेको कर्जाको व्याजदरमा पुनरावलोकन गरी एकल अंकमा कायम गर्नुपर्ने लगायतका माग देउवालाई थमाएर लगानीकर्ता संघका नेताहरु फर्किएका छन् ।
