अन्तर्वार्तामा नामै तोकेर शेयर किन्न उक्साउनेहरु धितोपत्र बोर्डको निगरानीमा

बिजपाटी संवाददाता

बिजपाटी संवाददाता

Dec 08, 2023 | 03:45:39 PM मा प्रकाशित

laxmi  sunrise bank

नेपाल धितोपत्र बोर्डले निश्चित कम्पनीको शेयर खरिद वा विक्री गर्न उत्साहित गराउने उद्देश्यले सूचना सम्प्रेषण नगर्न आग्रह गरेको छ। त्यसो गरेमा धितोपत्र कारोवार सम्बन्धी कसूर गरेको मानि कारवाही गर्ने चेतावनी बोर्डले दिएको छ ।  

विभिन्न संचार माध्यम तथा फेसबुक, युट्युब, क्लबहाउस् जस्ता सामाजिक सञ्जालमार्फत नेप्से परिसूचक तथा सूचिकृत संगठित संस्थाको शेयरको मूल्य बढ्ने वा घट्ने भन्दै निश्चित शेयरहरु खरिद वा बिक्री गर्न तथा खरिद वा बिक्री नगर्न उत्साहित गराउने उद्देश्यले अनाधिकृत तवरले अन्तरवार्ता र अभिव्यक्ति दिई बजारलाई प्रभावित पार्न खोजिएको सम्बन्धमा बोर्डमा गुनासो तथा उजुरी आएको बोर्डले जनाएको छ ।   यस बारे बोर्डको गम्भिर ध्यानाकर्षण भएको बोर्डले उल्लेख गरेको छ ।  

यस्ता कार्य गर्ने माथि सुक्ष्म निगरानी भैरहेको र बजार प्रभावित बनाउने कार्य भएको देखिएमा कानुन बमोजिम कारवाहि गर्ने चेतावनी बोर्डले दिएको छ  । बोर्डले भनेको छ 'धितोपत्र सम्बन्धी ऐन, २०६३ ले कसैलाई धितोपत्र कारोवारमा प्रत्यक्ष वा अप्रत्यक्ष प्रभाव पार्न आफैले वा अरुसँग मिली धितोपत्र किन्न वा बेच्न उत्साहित गराउन बर्जित गरेको र सो गरेमा धितोपत्र कारोवार सम्बन्धी कसूर गरेको मानिने व्यहोरा जानकारी गराउँदै संचार माध्यम तथा सामाजिक सञ्जाल वा अन्य कुनै माध्यमबाट टिका टिप्पणी तथा सूचना सम्प्रेषण गरी निश्चित शेयरहरु खरिद तथा विक्री गर्न वा नगर्न अभिप्रेरित गर्ने वा बजारको स्वतन्त्र रुपमा संचालन हुने व्यवस्थालाई प्रभाव पार्ने उद्देश्यले त्यस्तो कार्य नगर्न नगराउन तथा त्यस्ता कार्यहरु अविलम्व रोक्न सूचित गरिन्छ ।'

सूचनाको बेवास्ता गरी त्यस्तो कार्य गरेको पाईएमा धितोपत्र सम्बन्धी ऐन, २०६३ बमोजिम कारवाही हुने बोर्डले जनाएको हो ।  बजार प्रभावित बनाउने कार्य भएको देखिएमा कानुन बमोजिम कारवाहि अगाडि बढाईने बोर्डले उल्लेख गरेको छ । 

बोर्डले  समस्त लगानीकर्ताहरुलाई कसैको उक्साहटमा नलागी सुझबुझपूर्ण तवरमा लगानी गर्न अनुरोध गरेको छ । 

Share Your Thoughts

Recent News

Main News

TRENDING

Close in 7


Bizpati.com © 2020. All Rights Reserved