शेयर कारोबारको पहिलो दिनमा सर्वोत्तम सिमेन्टको शेयर मूल्यमा सकारात्मक सर्किट लागेको छ । नियमित शेयर कारोबार सुरु भएको १० मिनेटमा कम्पनीको शेयर मूल्यमा पोजेटिभ सर्किट लागेको हो ।
यो समाचार तयार पार्दासम्म कम्पनीको शेयर मूल्य १० प्रतिशतले बढेर ६११.६० रुपैयाँ कायम रहेको छ । नियमित कारोबार समयमा कम्पनीको शेयर मूल्य ५५.६० रुपैयाँले बढेको हो ।
नेप्सेमा अजबता सर्वोत्तम सिमेन्टको शेयर कारोबार सुचारु भएको हो । कम्पनीको SARBTM सिम्बलबाट कारोबार भएको हो ।
कम्पनीको पहिलो कारोबार प्रति कित्ता ५५६ रुपैयाँमा भएको थियो । नेप्सेले कम्पनीको पहिलो शेयर कारोबारको लागि १८५.३६ रुपैयाँ देखि ५५६.०८ रुपैयाँसम्मको सुरुवाती रेन्ज तोकेको थियो । यस रेन्जको बीचमा रहेको जुनुसुकै मूल्यबाट कम्पनीको कारोबार सुरु हुन सक्ने व्यवस्था थियो । नेप्सेले कम्पनीको पहिलो कारोबारको लागि नेटवर्थको ३ गुणासम्मको सुरुवाती रेन्ज तोक्ने गरेको छ ।
सोमबार कम्पनीको ४ करोड ६५ लाख कित्ता शेयर सुचिकृत भएको हो । सुचिकृत भएको ४ करोड ६५ कित्ता शेयर मध्ये संस्थापक समुहको ८७.०९६ प्रतिशत अर्थात् ४ करोड ५ लाख कित्ता रहेको छ । बाँकि रहेको १२.९०३ प्रतिशत अर्थात् ६० लाख कित्ता शेयर योग्य संस्थागत लगानीकर्ता, आयोजना प्रभावित स्थानीय, वैदेशिक रोजगारीमा रहेका नेपाली र आम नेपाली नागरिकलाई निष्काशन गरिएको हो ।
कम्पनीले बुक विल्डिंग विधिबाट आईपीओ निष्काशन गरेको हो ।
