आगामी महिना नेदरल्यान्डसँग उसकै घरेलु मैदानमा विश्व क्रिकेट लिग च्याम्पियनसिप खेल्ने तयारीमा रहेको नेपाल राष्ट्रिय क्रिकेट टोली मेरोलेबोन क्लबको निम्तोमा करिब एक सातादेखि बेलायतको भ्रमणमा रहेको छ । बेलायत भ्रमणको क्रममा नेपालले त्यहाँका ४ स्थानीय क्लबसंग अभ्यास खेल खेलिसकेको छ । नेपालले उत्कृष्ट प्रदर्शन गर्दै साबि ४ खेलको नतिजा आफ्नो पक्षमा परिसकेको छ ।
अब नेपालले भोलि मंगलबार विश्वकै पुरानो मेरिलिबोन क्रिकेट क्लब (एमसिसी)संग बेलायतको लर्ड्स मैदानमा प्रतिस्पर्धा गर्ने छ । ४ ओटै खेलमा जित दर्ता गरेको नेपाली टोली उच्चा मनोबलमा छ ।
बिश्व कै पुरानो टोलीसंग नेपालले लर्ड्स मैदानमा खेल्न लागेको यो पहिलो पटक हो। नेपाली क्रिकेट प्रेमीहरुले यस ऐतिहासिक क्षणको घर मै बसी मज्जा लिन सक्ने छन् ।
एमसीसीले आफ्नो आधिकारिक युट्युब च्यानल मार्फत खेलको प्रतक्ष्य प्रसारण गर्ने जनाएको छ ।
नेपाल र बेलायतबीच कुटनीतिक सम्बन्ध कायम भएको २०० बर्ष पुगेको अवसरमा यो खेल हुन् लागेको हो । क्रिकेटको मक्का समेत भनिने लर्ड्समा हुन् लागेको यो खेल ५० ओभरको हुनेछ ।
बेलायत प्रस्थान गर्नु अघि नेपाली टोलीका कप्तान तथा प्रशिक्षकले नेपालका लागि लर्ड्समा खेल्नु नै ठूलो अवसर भएको बताएका थिए । खेल हेर्न १० हजार नेपाली आउने अनुमान आयोजकले गरेको छ । खेलको लागि टिकटको मूल्य १० पाउण्ड राखिएको छ भने ६५ बर्षभन्दा बढी उमेरकाले ५ पाउण्ड मै खेल हेर्न सक्ने छन् । १६ बर्ष मुनिकाले निशुल्क रंगशालामा गएर खेल हेर्न सक्ने छन् ।
खेल नेपाली समय अनुसार दिउँसो ४:१५ बजे सुरु हुनेछ ।