भन्सार विभागका महानिर्देशक रामेश्वर दंगालले गत असार १ गतेदेखि २४ वटै भन्सार कार्यालयमा जाँच पासको लागि ब्रोकर मोडेल लागू भएको बताएका छन् । बिहिवारबाट राजधानीमा सुरु भएको भन्सार व्यवस्थापन गोष्ठिमा बोल्दै महानिर्देशक दंगालले भन्सारलाई व्यवस्थित गर्न ब्रोकर मोडेल लागू गरिएको बताए ।
भन्सार कार्यालयमा भौतिक जाँचपास र भ्यालुएसन जाँचपास गर्ने छुट्टा छुट्टै अधिकृतहरु खटाइएएको हुनाले भन्सार पासमा सहजता आएको उनको दाबी छ । भन्सारमा हुने भ्यालुएसन विवाद अन्त्य गर्न विभागले नयाँ भ्यालुएसन मोडेल पनि लागू गर्ने तयारी गरेको उनले जानकारी दिए । यो मोडेल लागू गर्नको लागि मेची, कृष्णनगर र ड्राइपोर्ट भन्सार कार्यालयमा पाइलटिङ परीक्षण सुरु गरिएको उनले बताए ।
यो मोडेल लागू भएपछि भन्सार विभागको केन्द्रीय प्रणालीमा ‘अटोमेटिक डाटा इन्ट्री’ हुने भएकाले व्यवसायीलाई पनि सहज हुने महानिर्देशकको विश्वास छ । विभागले भन्सारमा नगद कारोबार शुन्य बनाउन २२ वटा भन्सार कार्यालयमा बैंकिङ काउन्टर स्थापना गरिसकेको, तातोपानी भन्सारमा काउन्टर स्थापनाका लागि सम्झौता भएको र बाँकी एक भन्सार कार्यालयमा पनि काउन्टर स्थापनाको अन्तिम तयारी भईरहेको विभागले जनाएको छ । यसपछि भन्सारमा हुने सम्पूर्ण कारोबार बैंकिङ प्रणालीबाट हुने उनले दाबी गरे ।
विभिन्न यात्रुहरुले ल्याउने सामानमा भन्सार शुल्क उठाउन ठूला कार्यालयहरु विराटनगर, बीरगञ्ज, भैरहवा र नेपालगञ्जमा यात्रु कक्षमै बैंकको काउन्टर राखिएको विभागले जनाएको छ । अन्य भन्सार कार्यालयमा भएका काउन्टरले भने दुवैतिरको काम भ्याउने छन् । यसले अन्तराष्ट्रिय ब्यापारमा कम समय र वित्तिय लागत समेत घटाउने हुँदा व्यवसायीलाई समेत सहज हुने महानिर्देशक दंगालको दाबी छ ।
कार्यक्रममा नेपाल चेम्बर अफ कर्मशका अध्यक्ष राजेशकाजी श्रेष्ठले अहिले नेपालमा भन्सार मुल्याङ्कन रहेको तर WTO को सदस्य मुलुक कुनैमा पनि यस्तो नभएको बताए । ‘अन्य मुलुकमा कारोबार मूल्य भन्ने हुन्छ र त्यसलाई ३ महिनासम्म कायम राखिन्छ’ उनले भने, ‘नेपालको भन्सार विभागमा रहेको ढड्डा फालेर कारोबार मूल्य LC अथवा खरिद विलको आधारमा भन्सार दर कायम गरौ त्यसको लागि अहिलेको भन्सार दरमा परिमाजन गरौ ।’
