लगातारको
वर्षाका कारण पाकिस्तानमा विभिन्न ठाउँमा बाढी पहिरो आएको र मानवीय तथा भौतिक
क्षति भएपछि राष्ट्रिय सङ्कट घोषणा गरिएको छ । पाकिस्तान
सरकारले बिहीबार राष्ट्रिय सङ्कट घोषणा गर्दै आफ्ना सबै शक्ति तथा कार्यक्रम
प्रभावित क्षेत्र र पीडित जनतामा केन्द्रित गरिने जनाएको छ ।
मध्य जुलाईदेखि
असामान्य रूपमा आएको वर्षाले निम्त्याएको बाढी पहिरोका कारण ज्यान जानेको संख्या
१२ सय भन्दा बढी रहेको अन्तर्राष्ट्रिय समाचार एजेन्सी एपी न्यूजले जनाएको छ ।
पाकिस्तानमा
परेको मानवीय संकटबारे अन्य देशहरूले चासो देखाइरहेका छन् र सहायता पनि अफर
गरिरहेका छन् । पाकिस्तानसँग शत्रुतापूर्ण सम्बन्ध रहेको भनिएको भारतका
प्रधानमन्त्री नरेन्द्र मोदीसमेतले पाकिस्तानमा देखिएको मानवीय संकट छिटै समाधान
हुने आशासहित सोमवार ट्वीट गरे ।
संयुक्त राष्ट्रसँघदेखि
लिएर अन्य धेरै देशहरूले पाकिस्तानमा मानवीय सहायताका लागि अपील गरिरहेका छन् ।
निष्क्रिय नै भएको भएपनि दक्षिण एसियाली क्षेत्रीय सहयोग संगठन (सार्क)को अध्यक्षका
हैसियतले नेपालले निभाउनुपर्ने भूमिका भने अझै निभाएको छैन ।
प्रधानमन्त्री
कार्यालय पाकिस्तानको मानवीय संकटबारे चुप छ । प्रधानमन्त्री शेरबहादुर देउवाले न
यसबारे औपचारिक रूपमा केही बोलेका छन्, न त गठबन्धनको बैठकमा यसबारे कुनै छलफल नै
गरेका छन् । केही दिनअघि मात्र देउवाका परराष्ट्र सल्लाहकार बनेका अरुण कुमार
सुवेदी पनि पाकिस्तानमा देखिएको मानवीय संकटका विषयमा औपचारिक रूपमा केही बोल्न
सकेका छैनन् ।
पाकिस्तानको
मानवीय संकटबारे चुप बसेर नेपालले आफ्नो अन्तर्राष्ट्रिय कूटनीतिलाई थप कमजोर
बनाएको भन्दै देउवा सरकारको आलोचना हुन थालेको छ ।
भारतका लागि
नेपालका पूर्व राजदूत दीपकुमार उपाध्याय निष्क्रिय नै भएपनि सार्कको अध्यक्षका
हैसियतले पाकिस्तानमा देखिएको मानवीय संकटबारे बोल्नुपर्ने आवश्यकता औंल्याएका छन्
।
'यसबारे
सरकार बोल्नुपर्छ,' उपाध्यायले बिजपाटीसँग भने, 'हामी निष्क्रिय नै भएपनि सार्कका
अध्यक्ष हौँ । पाकिस्तानको समस्यालाई लिएर भारतका प्रधानमन्त्री पनि औपचारिक रूपमा
दुख प्रकट गरिसक्नुभएको छ । हामी पनि बोल्नुपर्छ ।'
त्यस्तै
पूर्व परराष्ट्रमन्त्रीसमेत रहेका नेकपा एमालेका नेता प्रदीपकुमार ज्ञवाली पनि पाकिस्तानमा
देखिएको मानवीय संकटका विषयमा सरकारको ठोस धारणा आउनुपर्ने बताउँछन् ।
'अहिलेको सरकार
अन्तर्राष्ट्रिय मामिलामा निकै चुप देखिएको छ,' ज्ञवालीले बिजपाटीसँग भने, 'हामी
अन्तर्राष्ट्रिय कूटनीतिका हिसाबले जिम्मेवार देश हौँ भन्ने देखाउन सरकार कहीं न
कहीं चुकेको देखिन्छ । यसबारे सरकार बोल्नुपर्छ र पाकिस्तानलाई मदतसमेत गर्नुपर्छ
।' ज्ञवालीले २०७२ सालमा नेपालमा गएको भू-कम्पमा पाकिस्तानले उल्लेख्य सहयोग गरेको
स्मरणसमेत गरे ।
