भारतीय केन्द्रीय बैंक रिजर्भ बैंक अफ इण्डियाले ब्याजदर नबढाउने निर्णय गरेको छ । भारतीय केन्द्रीय बैंकका गभर्नर शशिकान्त दासले मौद्रिक नीति कमिटिले रिपो रेट (पोलिसी रेट) हाललाई नचलाउने निर्णय गरेको बताएका हुन्।
भारतीय केन्द्रीय बैंकले लगातार ६ पटक रिपोरेट बढाएको र यस पटक भने स्थिर राखेको इकोनोमिक टाइम्सले जनाएको छ । हाल रिपो रेट ६.५ प्रतिशत रहेको छ । केन्द्रीय बैंकले यस पटक रिपो रेटलाई ०.२५ प्रतिशत बढाउने अनुमान गरिएकोमा केन्द्रीय बैंकबाट हाललाई रिपो दर स्थिर राख्ने निर्णय भएको भारतीय संचारमाध्यमहरुले जनाएका छन् ।
गभर्नर दासले यस पटकको लागि मात्र रिपो रेट स्थिर राखिएको र आगमी दिनमा आवश्यकता हेरेर अगाडी बढ्ने बताएका छन् । त्यस्तै उनले महँगी दर बढ्दै गएकोले महँगी विरुद्दको युद्द बाँकि नै रहेको बताएका छन् ।
गभर्नर दासले सन् २०२४ मा भारतको आर्थिक वृद्धि ६.५ प्रतिशत कायम रहने प्रक्षेपण गरिएको बताएका छन् । सन् २०२३ मा भने आर्थिक वृद्धि ७ प्रतिशत हुने उनले उल्लेख गरेका छन्।
केन्द्रीय बैंकले ब्याज दर नबढाउने निर्णय गरेसँगै भारतीय शेयरबजार बढेको छ । बजार खुलेको केहि समय मै सेन्सेक्स १०० भन्दा बढी अंकले बढेको भारतीय संचार माध्यमहरुले जनाएका छन् ।
