भारतीय पुँजीबजारको नियामकीय निकाय सेक्युरिटिज एण्ड एक्सचेन्ज बोर्ड अफ इण्डिया (सेबी)ले आईपिओ निष्काशन गरेका कम्पनीले शेयर सूचीकरण गर्नु पर्ने समय घटाएको छ। यस अघि आईपिओ बिक्री बन्द भएको ६ दिनमा शेयर सूचीकरण गर्नु पर्ने व्यवस्था रहेकोमा अब त्यसलाई आधा घटाईएको हो।
अब आईपिओ बिक्री बन्द भएको ३ दिन भित्र शेयर सूचीकरण गरिसक्नु पर्ने व्यवस्था सेबीले ल्याएको हो । यो नयाँ व्यवस्था सेप्टेम्बर १, २०२३ देखि स्वेच्छिक रुपमा र डिसेम्बर १, २०२३ देखि अनिवार्य रुपमा लागु हुने सेबीले जनाएको छ ।
यस व्यवस्थाले आईपिओ परेकाहरुले साविकको भन्दा ३ दिन कम समयमा शेयर पाउने र आईपिओ नपरेकाले साविकको भन्दा ३ दिन कम समयमा शेयर नपरेको पैसा फिर्ता पाउने छन् । साथै आईपिओ बिक्री पछि सो कम्पनीको शेयर कारोबार पनि छिटो हुने छ ।
नेपालमा भने आईपिओ बिक्री गरिसकेपछि कति समयमा शेयर सुचिकृत गरिसक्नु पर्छ भन्ने कानुनी व्यवस्था नै छैन ।