एनएमबि बैक नेपाल राष्ट्र बैकबाट स्वीकृति प्राप्त गरी अमेरिकी डलरमा ऋण ल्याउने पहिलो बैक बनेको छ । बैकको क्षमता तथा योजनाको बिष्लेशण गरे पश्चात नेपाल राष्ट्र बैकले यो स्वीकृति प्रदान गरेको हो । गत अप्रिल २०१८ मा International Finance Corporation (IFC) का प्रतिनिधि मण्डलले एनएमबि बैकको भ्रमण गरि ऋणको कार्यान्यवन योजना तथा लगानी क्षेत्रहरुको अध्ययन गरेका थिए ।
बैंकले पहिलो चरणमा १ करोड ५० लाख अमेरिकी डलर बराबरकोको ऋण ल्याउन लागेको हो जुन डेढ अर्ब नेपाली रुपैयाँ हुन् आउंछ । आगामी ५ देखि ७ दिमा ऋण आईसक्ने बैंकका बाह्य मामिला प्रमुख कृष्ण सुवेदीले जानकारी दिए। बैंकले उक्त ऋण कृषि, ऊर्जा, पर्यटन, भौतिक निर्माण लगायतमा लगानी गर्न पाउने छ।
सुबेदीका अनुसार बैंकले अर्को एक संस्थाबाट १ अर्ब नेपाली रुपैयाँ बराबरको ऋण ल्याउने तयारी गरेको छ । यो प्रस्ताव बैंकले स्वीकृतिको लागि राष्ट्र बैंकमा पठाईसकेको छ ।
राष्ट्र बैंकले गत चैत २० गते प्राथमिक पुँजी (कोर क्यापिटल)को २५ प्रतिशतसम्म बिदेशी मुद्रामा ऋण लिन पाउने व्यवस्था गरेको थियो । राष्ट्र बैंकको निर्णय संगै आधा दर्जन बढी बैंकले विदेशबाट ऋण ल्याउने प्रक्रिया सुरु गरेका छन् ।
